[1] Dɔnkili dalaw kuntigi ka dɔnkili. Dawuda ka Zaburu.
[2] Mɔgɔ min bɛ a janto faantan na, o ye dubaden ye. Matigi na o kisi degun don na.
[3] Matigi na a kisi k'a ni mara, ka hɛrɛ di a ma dugukolo kan. A tɛna sɔn k'a bila a juguw bolo fewu.
[4] Ni a man kɛnɛ, Matigi na a dɛmɛ a ka dalan kan. Ni a banana, Matigi bɛ na bɔ a ye.
[5] Ne ko: «Matigi, i ka hinɛ ne la. I ka ne ni kɛnɛya, katuguni ne ye jurumu kɛ i la.»
[6] Ne juguw bɛ kuma jugu fɔ ne kama k'a fɔ ko: «A na sa ka a tɔgɔ ban tuma jumɛn?»
[7] Ni u dɔ nana bɔ ne ye, o bɛ kuma nugulenw fɔ. A bɛ tilenbaliya kow lajɛ a kɔnɔ, ni a bɔra kɛnɛma, a bɛ olu fɔ.
[8] Ne juguw bɛɛ bɛ dajukɔrɔ kuma fɔɲɔgɔn ye ne ko la, u bɛ ko jugu miiri ne kama.
[9] U b'a fɔ ko: «Bana jugu y'a sɔrɔ sisan, ko a dalen filɛ, a tɛna wuli tun.»
[10] Hali ne teri yɛrɛ, ne bolo kurulen tun bɛ min na, min ye dumuni kɛ ne fɛ tabali la, o wulila ne kama.
[11] Nka Matigi, i ka makari ne la ka ne lawuli, walisa ne ka ne tɔɔrɔbaaw tɔɔrɔ i ko u ye ne tɔɔrɔ cogo min na.
[12] Ni ne juguw ma se ka ne lafili, ne n'a dɔn o de la ko ne ko ka di i ye.
[13] Ɔwɔ, i bɛ ne mara ne ka tilennenya kosɔn, i na ne mara i ɲɛ kɔrɔ tuma bɛɛ.
[14] Matigi, Israɛl ka Ala ka tanu badaa, badaa. Amiina! Amiina!