[1] Dɔnkili dalaw kuntigi ka dɔnkili. Dawuda ka Zaburu. Dɔnkili.
[2] Ala, i ka kan ni tanuli ye. I tanuli dɔnkili filɛ ka bɔ Sion. An bɛ an ka dafalew bɔ i ye.
[3] E min bɛ delili lamɛn, dafɛn bɛɛ bɛ taa i yɔrɔ.
[4] Tilenbaliya doni ye ne kuru, nka e bɛ an ka sariya tiɲɛn kow yafa an ma.
[5] I ye mɔgɔ min ɲɛnatɔmɔ ka a to a ka gɛrɛ i la, walisa a ka sigi i ka dukɛnɛw la, o ye dubaden ye. An na fa i ka so kɔnɔ fɛnɲumanw la, i batosoba senuma kɔni.
[6] An Kisibaa Ala, i ye an jaabi ni i ka kɛwale kabakomaw ye i ka tilennenya kosɔn. Mɔgɔ minw bɛɛ bɛ dugukolo dan na ani kɔgɔji kɔ fɛ, olu bɛɛ jigi bɛ i kan.
[7] Ala bolo bɛ kuluw sabati a ka sebaaya barika la, a cɛ sirilen bɛ ni sebaaya ye.
[8] A bɛ kɔgɔji kuruw mankan mada ka jamaba wɔyɔkan mada.
[9] Mɔgɔ minw sigilen bɛ fo dugukolo dan na, olu ja tigɛlen don i ka kɛwale kabakomaw fɛ. I bɛ tilebɔ fan ni tilebi fan faɲagali la.
[10] I bɛ na bɔ dugukolo ye ka sanji di a ma, i b'a diya ka a sɛnɛ fɛnw ɲɛ kosɛbɛ haali. Ala, i ka ba fara ji la, i bɛ dugukolo labɛn ten, i bɛ sɛnɛ fɛnw di u ma.
[11] I bɛ ntugun wɛlɛnw fa ji la ka ntugun latilen. I bɛ u sɔn ni ji ye ka u falen kun barika bonya.
[12] I bɛ san diya ni i ka fɛnɲumanw ye, fɛn tulumaw bɛ toni i sen nɔw la.
[13] U bɛ toni kungokolon bin nugu yɔrɔw kan, tintinw cɛ sirilen bɛ niɲagali ye.
[14] Bagankuluw kɛra ka kungo kɔnɔ na fa, jɛkɛnɛw fara sɛnɛ fɛnw na. Ɲagali dɔnkili dakan bɛ fan bɛɛ la.