[1] Dawuda ka Zaburu. Matigi, i ka kɛ ne juguw kɛlɛbaa ye. Minw bɛ ne kɛlɛ, i ka olu kɛlɛ.
[2] I ka nɛgɛ bɛnnan misɛn ni nɛgɛ bɛnnanba ta ka wuli ka ne dɛmɛ.
[3] I ka tama yigiyigi ka sira tigɛ ne nɔgɛnbaaw ɲɛ. I k'a fɔ ne ni ye ko: «Ne ye i kisibaa de ye.»
[4] Minw b'a fɛ ka ne faga, olu ka maloya ka kunna siri. Minw b'a fɛ ka ne halaki, olu ka segin kɔ ka maloya.
[5] U ka kɛ i ko fiɲɛ bɛ taa ni nwɛɲɛ min ye. Matigi ka mɛlɛkɛ ka u nɔgɛn.
[6] U ka siraw ka kɛ dibi ni cɛɛnɛ yɔrɔ ye. Matigi ka mɛlɛkɛ ka u nɔgɛn,
[7] katuguni u ye u ka janw da neɲɛ, k'a sɔrɔ ne ma foyi kɛ. U ye dingɛ sen ne fagali kama, k'a sɔrɔ ne ma foyi kɛ.
[8] Halaki ka cun u kan k'a sɔrɔ u m'a dɔn. U ka minɛ u yɛrɛw ka juru dalen na, u ka bi o kɔnɔ ka halaki.
[9] O tuma la ne dusukun na ɲagali Matigi la ka ne nisɔndiya a ka kisili la.
[10] Ne kolow bɛɛ n'a fɔ ko: «Matigi, jɔn bɔlen bɛ e fɛ? E min bɛ mɔgɔ degunnenw kisi mɔgɔ barikamaw ma, ka faantan ni kɔlibaatɔ tila a bolo fɛn bɔsibaa la.»
[11] Seere juguw wulila ne kama, ka ne jalaki gwansan.
[12] U bɛ ne ka ko ɲuman sara ni ko jugu ye, u bɛ ne ni halaki.
[13] Nka u banana tuma min na, ne ye cafu fini don ne la, ka ne ni tɔɔrɔ ka sun don, ka delili kɛ ka ne kun suulilen to ne disi la.
[14] Ne tun bɛ taama dɔɔnin dɔɔnin, i ko ne teri dɔ wala ne balimakɛ dɔ sara. Ne tun bɛ ne biri ka kasi, i ko mɔgɔ min bɛ a ba su kasi.
[15] Nka ni ne tɔɔrɔla, u bɛ u lajɛ ka ɲagali. U bɛ ɲɔgɔn lajɛ ne kama ka yɛlɛ bɔ ne la. U bɛ ne farafara tuma bɛɛ.
[16] Ka u to kakala nuguma yɛlɛbɔlaw cɛma, u ye u ɲinw ɲimi ne kama.
[17] Matigi, i na to ka nin kow muɲu fo tuma jumɛn? I ka ne ni kisi u ka fariya kow ma, ka ne kisi o wara juguw ma.
[18] Ayiwa, ne na i tanu jamaba cɛma, ne na barika da i ye mɔgɔ caman cɛma.
[19] Jugu barikama minw ye nkalon da ne la, i kana sɔn olu ka ɲagali ne kosɔn, ani minw ye ne koniya ni kun t'a la, u kana u ɲɛ kɔmi ne kama,
[20] katuguni u tɛ hɛrɛ kuma fɔ fewu, nka mɔgɔ minw lafiyalen bɛ jamana kɔnɔ, u bɛ jɛ siri dibi la olu kama.
[21] U bɛ u daw bɛɛ waa ne kama, k'a fɔ ko: «Aa, aa, anɲɛ y'a ye.»
[22] Matigi, e yɛrɛɲɛ ye u ye, i kana u to yen. Matigi, i kana i mabɔ ne la.
[23] Ne ka Ala ni ne Matigi, i ka kunun ka wuli, ka tiɲɛ di ne ma ka ne lafasa.
[24] Matigi, ne ka Ala, i ka kiri tigɛ ne kan ni i ka tilennenya ye. U kana ɲagali ne kosɔn.
[25] U kana a fɔ u kɔnɔ ko: «Payi, payi. An tun bɛ min fɛ, o filɛ nin ye.» U kana a fɔ ko: «An ye a halaki.»
[26] Minw bɛɛ bɛ ɲagali ne ka tɔɔrɔ kow la, olu ka maloya ka u kun biri. Minw bɛ wuli ka kuncɛbaya kɛ ne kama, maloya ni mafiɲɛyali ka kɛ ka olu datugu.
[27] Ne ka jo sɔrɔli ko ka di minw ye, olu ka dɔnkili da ka ɲagali. Ɔwɔ, olu k'a fɔ tuma bɛɛ ko: «Matigi ka tanu. A ka baaraden ka hɛrɛ ko ka di a ye.»
[28] Ayiwa, ne nɛnkun na i ka tilennenya ko fɔ, ka i tanu don o don.