[1] Dɔnkili dalaw kuntigi ka dɔnkili. Baga feere ko la. Korɛ denkɛw ka dɔnkili. Kanuya dɔnkili.
[2] Ne dusukun fara kuma dumanw la fo ka bɔn. Ne ko: «Ne ka kɛwalew ka kɛ masakɛ ta ye.» Ne nɛn bɛ i ko sɛbɛnnikɛlaɲuman ka sɛbɛnni kala.
[3] I cɛ ka ɲi ka tɛmɛn Hadamadenw kan. Nɛɛma bɛ bɔ i da fɛ. O de kosɔn Ala ye duba kɛ i ye badaa.
[4] Kɛlɛkɛ cɛ ja gɛlɛn, i cɛ siri ni i ka npan ye. I labɛnnen ni saramaya ye.
[5] Ɔwɔ, i cɛ ka ɲi. I ka don i ka wotoro kɔnɔ ka boli ka se sɔrɔ, ka kɛlɛ kɛ tiɲɛ ni majiginlenya ni tilennenya kosɔn. I kininbolo na se sɔrɔlibaw di i ma.
[6] I ka biɲɛw nunw ka di, olu na mɔgɔw bi i sen kɔrɔ ka masakɛ juguw faga.
[7] Ala, i ka masasigilan sigilen bɛ to badaa, badaa. I ka masaya bere ye tilennenya bere ye.
[8] I bɛ tilennenya kanu ka juguya koniya. O de kosɔn, Ala, i ka Ala ye i mun. A ye i mun niɲagali tulu ye ka tɛmɛn i tɔɲɔgɔnw bɛɛ kan.
[9] Mirɛ ni aloes ni kase tulu suma dumanw kɛra i ka finiw kan. Masaya so samaɲinw ni fɔlifɛnw kɛra i ka ɲagali sababu ye.
[10] Masakɛ denmusow bɛ i ka muso kanulenw cɛma. Masamusoma sigilen bɛ i kinin fɛ, o masirilen bɛ ni Ofir sanu ye.
[11] Ne denmuso, i tulo majɔ ka lamɛnni kɛ. I ka ɲinɛ i ka mɔgɔw ni i fa ka so mɔgɔw kɔ.
[12] I nege bɛ masakɛ la i cɛɲɛ kosɔn, ale ye i matigi ye, i ka a bonya.
[13] Tir mɔgɔw bɛ na ni nili fɛn ye u bolo, mɔgɔw bɛɛ la nafolotigibaw na i ka ɲumaya ɲini.
[14] Masakɛ denmuso donna masaya nɔɔrɔ la. A ka finiw dara ni sanu ye.
[15] A labɛnnen taara jɔ masakɛ ɲɛ kɔrɔ ni fini sɔgɔlenw ye a kan na. A tɔɲɔgɔn npogotigiw tugulen bɛ a kɔ, olu fana ka taa i ɲɛ kɔrɔ.
[16] U bɛ taa ni dɔnkili dakan niɲagali ye ka don masakɛ ka so kɔnɔ.
[17] Masakɛ, i denkɛw na sigi i bɛnbaw nɔ na. I na olu sigi ka kɛ kuntigiw ye dugukolo yɔrɔw bɛɛ la.
[18] Ne na i tɔgɔ bonya bɔnsɔnw bɛɛ cɛma, o de kosɔn siyaw na i tanu badaa badaa.