[1] Dɔnkili dalaw kuntigi ka dɔnkili. Dawuda ka Zaburu. Matigi, i ye ne sɛgɛsɛgɛ ka ne dɔn.
[2] I bɛ ne sigili ni ne wulili dɔn, i bɛ i to yɔrɔ jan ka ne ka miiriliw dɔn.
[3] I bɛ ne taamatɔ ni ne datɔ kɔlɔsi, i bɛ ne ka kɛwalew bɛɛ dɔn.
[4] Matigi, hali sani kuma ka bɔ ne da la, i bɛ o bɛɛ dɔn ka ban.
[5] I bɛ ne kɔ fɛ ani neɲɛ fɛ ka ne lamini, i bɛ i bolo da ne kan.
[6] Oɲɔgɔn dɔnniya ye kabako de ye, ne tɛ se ka a faamu. A bɛ tɛmɛn ne ka ko dɔnta bɛɛ kan.
[7] Ne na taa min ka mabɔ i la, ne na boli ka taa min, ni i tɛ yen?
[8] Ni ne yɛlɛnna sankolo la, i bɛ yen, ni ne ye ne da kaburu kɔnɔ, a filɛ, i bɛ yen.
[9] Ni ne panna ka taa tilebɔ fan fɛ, ka taa ne sigi kɔgɔji dan na,
[10] hali yen i bolo na ne bolo minɛ, i kininbolo na ne minɛ.
[11] Ni ne ko: «Dibiba na ne datugu,» ayiwa, su na kɛ kɛnɛ ye ne fan bɛɛ la.
[12] Dibi tɛ ye i ɲɛ na, su bɛ yeelen bɔ i ko tile, su ni kɛnɛ ka kan i ɲɛ na.
[13] E de ye ne kɔnɔna fɛnw dila, i ye ne tugutuguɲɔgɔn na ne ba dɛbɛ la.
[14] Ne bɛ barika da i ye, ne farikolo dilali kosɔn i fɛ. O ye kɛwale kabakoma de ye min tɛ se ka faamu, ɔwɔ, i ka kɛwalew ye kabakow ye.
[15] Ne dilara yɔrɔ dogolen na ka ne tugutuguɲɔgɔn na tuma min na, ne kolow ma dogo i la.
[16] I ɲɛ tun bɛ ne la sani ne ka bange. Ne ko sɛbɛnnen tun bɛ i ka kitabu kɔnɔ, hali si tile minw latigɛra ne ye, sani u ka daminɛ.
[17] E Ala, i ka miiriliw ka bon ne ma, u dama dɔnbali don.
[18] Ne bɛ se ka u jate cogo di? U ka ca ni cɛncɛnkisɛw ye. Ni ne kununna tuma min na, a filɛ, ne tolen bɛ i fɛ.
[19] Ala, i ka mɔgɔ juguw faga, o de kosɔn, a' ye mabɔ ne la, mɔgɔ fagalaw.
[20] U bɛ ko jugu kɛ i tɔgɔ la, i juguw bɛ nkalon tigɛ i tɔgɔ la.
[21] Matigi, ne tɛ i koniyabaaw koniya wa? Minw bɛ wuli i kama, ne tɛɲigin olu la wa?
[22] Ne ye u koniya fo ka dama tɛmɛn, ka u jate ne juguw ye.
[23] Ala, i ka ne sɛgɛsɛgɛ ka ne dusukun dɔn, i ka ne kɔrɔbɔ ka ne ka miiriliw dɔn.
[24] I k'a filɛ ni ne bɛ sira jugu kan, i ka neɲɛ minɛ i ka sira banbali fɛ.