[1] Dɔnkili dalaw kuntigi ka dɔnkili. Matigi ka baaraden Dawuda ye tanuli dɔnkili min da Matigi ye, Matigi y'a tila ka bɔ Saul ni a juguw bɛɛ bolo tuma min na, a ye nin dɔnkili da o tuma la. A ko:
[2] Matigi, e min ye ne barika ye, ne bɛ i kanu.
[3] Matigi ye ne ka farakurun ni ne ka kɛlɛ kunbɛn so ani ne tilabaa ye. Ne ka Ala ye ne dogo yɔrɔ farakurun ye ani ne ka nɛgɛ bɛnnan ni ne kisibaa barikama ani ne marabaa.
[4] Ne n'a fɔ ko Matigi ka tanu. Ne tilara ka bɔ ne juguw bolo.
[5] Saya sirilanw tun melekera ne la, halakili jiwoyo tun ye ne tunun.
[6] Ɔwɔ, sirilanw tun melekera ne la, ne minɛna saya janw la.
[7] Ka ne tɔɔrɔlen to, ne ye Matigi deli, ne kasira ne ka Ala nɔ fɛ. A ye ne kan mɛn k'a to a ka masaya so kɔnɔ. Ne ye pɛrɛnkan min bɔ a ɲɛ kɔrɔ, o sera a tulo ma.
[8] O tuma la dugukolo yuguyugura ka yɛrɛyɛrɛ. Kuluw jusigilanw fana lamagara. U yuguyugura katuguni Matigi diminna.
[9] Sisi yɛlɛnna san fɛ ka bɔ a nunwow fɛ, tasuma bɔra a da la ka jenili kɛ, takamiw bɔra a da la.
[10] A ye sankolo fara ka jigin, sankaba fin tun bɛ a sen kɔrɔ.
[11] A yɛlɛnna serubɛn kan ka pan, a sigilen tun bɛ fiɲɛ kamanw kan.
[12] A ye dibi kɛ a sigi yɔrɔ ye i ko finiso, sankaba fin jiman kɛra k'a datugu.
[13] Nɔɔrɔ min tun bɛ a ɲɛ fɛ, sankaba ni sanbɛlɛ ani takamiw bɔra o la.
[14] Matigi pɛrɛnna sankolo la, Kɔrɔtalenba y'a kan bɔ sanbɛlɛ ni a takamiw cɛma.
[15] A ye a ka biɲɛw bon ka ne juguw jɛnsɛn. A y'a ka yeelenba ci ka u gɛn.
[16] O tuma la kɔgɔji jukɔrɔlaw yera, dugukolo jusigilanw bɔra kɛnɛkan. Matigi, o bɛɛ kɛra i diminnen kan ani i nunfiɲɛ kosɔn.
[17] Ala y'a bolo mɔɔnɔbɔ ka bɔ san fɛ ka ne minɛ, a ye ne sama ka bɔ jiba cɛma.
[18] A ye ne tila ne jugu barikamaw la, ani ne kɛlɛɲɔgɔn minw barika ka bon ni ne ta ye,
[19] olu minw bira ne kan ne degun waati la, nka Matigi kɛra ne sinsin yɔrɔ ye.
[20] A ye ne hɔrɔnya, a ye ne tila a ka kanuyaba kosɔn ne ta fan fɛ.
[21] Matigi ye ne baraji ka kɛɲɛ ni ne ka tilennenya ye, ka ne sara ne bolo jɛlenya kosɔn.
[22] K'a masɔrɔ ne ye Matigi ka sira taama ni kantigiya ye, sabu ne ma muruti ne ka Ala ma.
[23] A ka ci fɔlenw bɛɛ bɛ ne ɲɛ kɔrɔ, ne ma jɛngɛ ka mabɔ a ka ko latigɛlenw si la.
[24] Ne jalakibali tun don a ta fan fɛ, ne ye ne yɛrɛ kɔlɔsi ko jugu kɛli ma.
[25] O de kosɔn Matigi ye ne sara ka kɛɲɛ ni ne ka tilennenya ye. A ye ne sara ka kɛɲɛ ni ne bolo ka jɛlenya ye a ɲɛ na.
[26] Ni mɔgɔ min ye kantigi ye i ye, i bɛ kantigiya kɛ o ye. Ni mɔgɔ min dafalen don i ye, i bɛ dafalenya kɛ o ye.
[27] Ni mɔgɔ min ye jɛlenya kɛ i ye, i bɛ jɛlenya kɛ o ye. Nka ni mɔgɔ min ye dulenya kɛ, i na o ka koɲɛnabɔ ka kɛɲɛ ni a ka dulenya ye.
[28] Sabu e de bɛ mɔgɔ majiginlenw kisi, nka i bɛ kuncɛbaw majigin.
[29] I ka ne ka fitinɛ mana. Matigi, ne ka Ala na kɛnɛ bɔ ka ne ka dibi ban.
[30] Ne bɛ girin kɛlɛbolo kan e de barika la. Ne bɛ se ka kogo sago ne ka Ala barika la.
[31] Ala barikama ka siraw dafalen don. Matigi ka kuma kɔrɔbɔlen don. Mɔgɔ minw bɛɛ bɛ u yɛrɛw kalifa Matigi ma, a ye olu ka nɛgɛ bɛnnan de ye.
[32] Jɔn ye Ala ye ni Matigi tɛ, jɔn ye farakurun ye ni an ka Ala tɛ?
[33] Ale, Ala de bɛ barika don ne la ka neɲɛ minɛ sira tilennen fɛ.
[34] A bɛ ne sen kɛ i ko minan ta, a bɛ ne sigi yɔrɔ kɔrɔtalenw kan.
[35] A bɛ ne bolo dege kɛlɛ la, fo ne bolo bɛ nsiranɛgɛ kala sama.
[36] I ye i ka kisili nɛgɛ bɛnnan di ne ma. I kininbolo bɛ ne minɛ. I ka ɲumaya bɛ ne bonya.
[37] I ye sira bonya ne senw ye, ne senw tɛ cɛɛnɛ.
[38] Ne na ne juguw nɔgɛn ka kun u la, ne tɛna kɔsegin ni ne ma u faga ka u ban.
[39] Ne na u jogin fo u tɛna se ka wuli tun. U na bi ne sen kɔrɔ.
[40] I ye barika don ne la kɛlɛ kama. I ye ne juguw kuru ne kɔrɔ.
[41] I y'a to ne juguw ka boli neɲɛ, ne na ne koniyabaaw bɛɛ halaki ka u ban.
[42] U kasira nka mɔgɔ si ma na ka u tila. U kasira Matigi nɔ fɛ nka a ma u jaabi.
[43] O tuma la ne ye u ɲɔɲɔ i ko gwangwan min bɛ taa fiɲɛ fɛ, ka u fura ka bɔ yen i ko bɔgɔ min bɛ dugu bɔlɔnw na.
[44] I ye ne kisi ka bɔ mɔgɔ murutilenw bolo, ka ne sigi siyaw kun na. Ne tun ma siya minw dɔn, olu na baara kɛ ne ye.
[45] Kabini u ye ne kumakan mɛn, u sɔnna ne ka fɔlenw ma. Jamana wɛrɛ denw na ne mankutu fɔ.
[46] Jamana wɛrɛ denw jigi na tigɛ, u yɛrɛyɛrɛtɔ na bɔ u ka kɛlɛ kunbɛn sow kɔnɔ.
[47] Matigi ɲɛnama don. Ne ka farakurun ka bonya. Ne tilabaa Ala ka kɔrɔta.
[48] Ala bɛ ne mɔnɛbɔ, ka siyaw kolo ne ye.
[49] Matigi, i bɛ ne tila ka bɔ ne juguw bolo ka se di ne ma ne juguw kan. I bɛ ne kisi mɔgɔ farinmaw ma.
[50] O de kosɔn, Matigi, ne bɛ barika da i ye siyaw cɛma, ka i tɔgɔ tanuli dɔnkili da.
[51] Matigi bɛ kisili kobaw kɛ a ka masakɛ ɲɛnatɔmɔlen ye, ka a ka makariba jira a ka munlen na, Dawuda ni a bɔnsɔn bɛɛ la badaa badaa.