[1] Korɛ denkɛw ka Zaburu. Dɔnkili min dara dɔnkili dalaw kuntigi fɛɲɛnasisi ko la Zerak bɔnsɔn Heman ka kalan dɔnkili.
[2] Ne Kisibaa Matigi Ala, ne bɛ kasi i nɔ fɛ su fara tile kan.
[3] Ne ka deliliw ka se i ma, i tulo majɔ ne kasikan na,
[4] k'a masɔrɔ ne dusukun tɔɔrɔlen bɛ kosɛbɛ, ne ni saya cɛ man jan.
[5] Ne jatera kaburu kɔnɔ donbaaw cɛma, ne bɛ i ko mɔgɔ barikantan.
[6] Ne fililen bɛ suw cɛma, i ko mɔgɔ fagalen minw dalen bɛ kaburu kɔnɔ, i hakili tɛ o minw na tun, u halakira ka bɔ i bolo.
[7] I ye ne bila dingɛ dunba kɔnɔ, halaki dingɛ dibiba kɔnɔ.
[8] I ka dimiya digira ne la kosɛbɛ, i ye ne datugu ni kɔgɔji kuruw ye. Sela.
[9] I ye ne dɔnbaaw yɔrɔ janya ne la, ka ne kɛɲigin fɛn ye u ɲɛ na. Ne datugura, ne tɛ se ka bɔ tun.
[10] Tɔɔrɔ ye neɲɛ lafin. Matigi, ne bɛ i tɔgɔ wele don o don. Ne bɛ ne bolo mɔɔnɔbɔ i nɔ fɛ.
[11] I bɛ kabakow kɛ suw ɲɛ na wa? Mɔgɔ salenw na kunun ka i tanu wa? Sela.
[12] Yala i ka ɲumaya welewele bɛ da kaburu kɔnɔ, ka i ka kantigiya ko fɔ halaki dingɛ dunba kɔnɔ wa?
[13] I ka kabakow bɛ dɔn dibifin na wa? Mɔgɔ ka miirili bɛ ban kaburudo la, i ka tilennenya bɛ dɔn yen wa?
[14] Ne kɔni, Matigi, ne bɛ kasi e de nɔ fɛ, ne ka delili bɛ se i ma sɔgɔma da fɛ.
[15] Matigi, mun kosɔn i bɛ ne fili ka i ɲɛda dogo ne la?
[16] Ne ye mɔgɔ tɔɔrɔlen ye kabini ne denmisɛnma, ne bɛ ɲini ka sa. Ne bira i ka dimiya doni kɔrɔ.
[17] I ka dimiyaba ye ne datugu, i ka siran kobaw ye ne halaki.
[18] U bɛ ne lamini don o don i ko baji woyo, ka ne datugu yɔrɔ nin kelen.
[19] I ye ne teriw ni ne tɔɲɔgɔnw yɔrɔ janya ne la, dibi kɛra ne tɔɲɔgɔn ye.