[1] Dɔnkili dalaw kuntigi ka dɔnkili. Korɛ denkɛw ka Zaburu.
[2] Hadamadenw, aw bɛɛ ka lamɛnni kɛ. Dugukolo kan mɔgɔw bɛɛ ka u tulo majɔ,
[3] mɔgɔ misɛnw ni mɔgɔbaw, nafolotigiw ni faantanw.
[4] Ne da na hakilitigiya kuma fɔ. Ne dusukun falen bɛ dɔnniya la.
[5] Ne bɛ ne tulo majɔ hakilitigiw ka kalan na, ka o ɲɛ fɔ nkɔni la.
[6] Mun na ne ka siran degun don na ni ne juguw ka fariya kow wulila ka ne lamini tuma min na?
[7] U jigi bɛ u ka nafolow kan, u bɛ u yɛrɛw bonya u ka nafolotigiyaba ko la.
[8] Nka u si tɛ se ka u balima kunmabɔ wala ka u kunmabɔ wari sara Ala ye.
[9] Mɔgɔ ni kunmabɔ sɔngɔ ka bon. Mɔgɔ tɛ se ka a wari sɔrɔ abada,
[10] u ɲɛnama tɛna to badaa ka u yɛrɛw kisi kaburu ma.
[11] Ɔwɔ, u b'a ye ko hakilitigi bɛ sa, fatɔ ni nalonma fana bɛ sa ka u ka nafolow to mɔgɔ wɛrɛw ye.
[12] U bɛ miiri ko u ka sow bɛ to tuma bɛɛ, ko u sigi sow na to fo san caman. U bɛ u tɔgɔw da u ka dugukolow la.
[13] Nka Hadamaden tɔgɔba si tile tɛ mɛn. A bɛ sa i ko bagan fagataw.
[14] U bɛ sira min taama, o ye hakilintanya sira ye. O bɛɛ n'a ta, u kɔ mɔgɔw bɛ u ka kumaw tanu. Sela.
[15] U bɛɲɔni ka taa saya la i ko bagankulu. Saya bɛ u ɲɛ minɛ i ko saga gɛnna. Mɔgɔ tilennenw na u cɔngɔ u sen kɔrɔ sɔgɔma da fɛ. U cɛɲɛ bɛ tunun kaburu kɔnɔ, sigi yɔrɔ wɛrɛ tɛna kɛ u fɛ tun.
[16] Nka Ala na ne ni tila ka bɔ saya fanga bolo, k'a masɔrɔ a na ne ta ka ne mara a kɔrɔ. Sela.
[17] Ni mɔgɔ dɔ bolo fɛnw cayara, ni a ka so barika bonyara, i kana siran o ɲɛ.
[18] K'a masɔrɔ ni a sara, a tɛna taa ni foyi ye a bolo, a bolo fɛnw tɛna taa a sɛgɛrɛ kaburu kɔnɔ.
[19] K'a ɲɛnama to, a bɛɲagali a ka hɛrɛ kosɔn, dɔ wɛrɛ b'a tanu a ka fɛntigiya kosɔn.
[20] O bɛɛ n'a ta, a bɛ taa a bɛnbaw taa yɔrɔ la dibi la. A tɛna kɔsegin kɛnɛ la tun abada.
[21] Hadamaden ye bonyaba sɔrɔ, a hakili t'a la ko a ni bagan fagataw bɛɛ ka kan.