[1] Dɔnkili dalaw kuntigi ka dɔnkili, dɔnkili min dara ni nkɔni juruw ye. Dawuda ka Zaburu.
[2] Ala, i tulo majɔ ne ka delili la. Ni ne bɛ i deli tuma min na, i kana i dogo.
[3] I ka ne lamɛn ka ne jaabi. Ne hakiliɲaaminen bɛ ne ka tɔɔrɔw kosɔn fo ne ka nwunan,
[4] ne juguw ni mɔgɔ juguw ka degunni kosɔn. U bɛ tugu ne nɔ fɛ ni fariya ye.
[5] Ne dusukun bɛ yɛrɛyɛrɛ ne kɔnɔ, sayaɲɛsiran ye ne minɛ.
[6] Siran ni yɛrɛyɛrɛ ye ne minɛ, ja tigɛ ye ne sɔrɔ.
[7] O tuma la ne ko: «Ni a tun kɛra ko kamanfuraw bɛ ne la i ko ntubanni, ne tun na pan walisa ne ka lafiya sɔrɔ.
[8] Ɔwɔ, ne tun na boli ka taa yɔrɔ jan ka ne dogo kungokolon kɔnɔ.
[9] Ne tun na boli ka dan kɛ ka kisi fiɲɛba ni sanji barikama ma.»
[10] Matigi, i ka ne juguw kan ɲaami, ka u ka dabaliw tiɲɛn, k'a masɔrɔ ne ma foyi ye dugu kɔnɔ fariya ni kɛlɛ kɔ.
[11] Olu bɛ o dugu lamini su fara tile kan, ko jugu ni ko bɛnbali bɛ a kɔnɔ.
[12] O dugu bɔlɔnw falen bɛ tilenbaliya la, lafilili ni nanbara bɛ yen tuma bɛɛ.
[13] Ne mafiɲɛyabaa tun tɛ ne jugu ye, ni o tun don, ne tun bɛ se k'a muɲu. Nin min ye a yɛrɛ bonya ne kama, o tun tɛ ne koniyabaa ye. Ni o tun don, ne tun na ne yɛrɛ dogo a la.
[14] Nka e de ye ne tɔɔrɔbaa ye, ne jɛɲɔgɔn, ne teri sɛbɛ ni ne dannamɔgɔ kɔni.
[15] An tun ka di kosɛbɛ, an tun bɛ taa jamaba fɛ Ala ka so kɔnɔ.
[16] Saya ka cun u kan, u ɲɛnama ka jigin kaburu kɔnɔ, k'a masɔrɔ juguya maralen bɛ u ka sow ni u dusukunw na.
[17] Ne kɔni, ne na kasi Ala nɔ fɛ. Matigi na ne kisi.
[18] A na ne ka tɔɔrɔ ni ne nwunankan mɛn, sɔgɔma da ni tile gwan ani wula da fɛ, a na ne ka delili lamɛn.
[19] Kɛlɛ min tun bɛ ne kama, a ye ne kisi o ma ka ne don hɛrɛ la, k'a masɔrɔ ne juguw tun ka ca.
[20] Ala na ne kan lamɛn ka u sara, ale min bɛ to masaya la badaa badaa. Sela. O bɛɛ n'a ta, u tɛ sɔn ka yɛlɛma, u tɛ siran Ala ɲɛ fewu.
[21] A ni minw sigilen tun bɛɲɔgɔn fɛ, a y'a bolo kɔrɔta olu kama ka a ka layidu talen tiɲɛn.
[22] A ka kumaw tun ka nugu i ko nare, nka kɛlɛ tun bɛ a dusukun na. A ka kumaw tun ka maga i ko tulu, nka u bɛ mɔgɔ tigɛtigɛ i ko npan.
[23] I ka i hamina kow bɛɛ da Matigi kan, ale na i mara. A tɛna sɔn mɔgɔ tilennen ka lamaga abada.
[24] Ala, i na u lajigin kaburu kɔnɔ. Mɔgɔ minw bɛ mɔgɔ faga ka nanbara kɛ, olu tɛna hali u si tile tilancɛ sɔrɔ. Nka ne bɛ ne jigi da e de kan.