[1] Dawuda ka Zaburu. Matigi ye ne ka kɛnɛ ni ne kisibaa ye. Ne na siran jɔniɲɛ? Matigi ye ne ni marabaa ye, ne ja na tigɛ jɔniɲɛ?
[2] Mɔgɔ juguw nana ne kama ko u bɛ ne farisogo dun tuma min na, ne kɛlɛɲɔgɔnw ni ne juguw kɔni, u talonna ka bi.
[3] Hali ni kɛlɛbolo ye daga sigi ne da la, ne dusukun tɛna siran fewu. Ni kɛlɛ wulila ne kama, halio, ne jigi na sigi.
[4] Ne ye fɛn kelen deli Matigi fɛ, ne na o de ɲini. Ko ne ka sigi Matigi ka so kɔnɔ ne si tilew bɛɛ la ka Matigi nɔɔrɔ filɛ, ka kabakoya a batosoba la,
[5] katuguni a na ne sigi a ka finiso kɔnɔ degun don na, ka ne dogo a ka finiso dogodogo la. A na ne yɛlɛn fara kan.
[6] Sisan ne kun bɛ kɔrɔta ne lamini juguw san fɛ. Ne na ɲagali sarakaw bɔ Matigi ka so kɔnɔ. Ne na dɔnkili da, ɔwɔ, ne na tanuli dɔnkili da a ye.
[7] Matigi, ne bɛ i deli, i ka ne kan lamɛn. I ka hinɛ ne la ka ne jaabi.
[8] I ko: «A' ye neɲɛda ɲini.» Ne dusukun y'a fɔ i ye ko: «Matigi, ne na i ɲɛda ɲini.»
[9] I kana i ɲɛda dogo ne la. I kana dimin ka i ka jɔn gɛn. I ye ne dɛmɛbaa ye, i kana ne bila. I kana taa ka ne to yen, ne kisilitigi Ala.
[10] Hali ni ne fa ni ne ba ye ne bila, Matigi na ne ladon.
[11] Matigi, i ka ne kalan i ka sira la, ka neɲɛ minɛ sira jɛlen fɛ ne juguw kosɔn.
[12] I kana ne bila ne juguw bolo, katuguni seere nkalontigɛlaw ni mɔgɔ farinmaw wulila ne kama.
[13] E, ni ne tun ma da a la ko ne na Matigi ka ɲumaya ye, mɔgɔɲɛnamaw cɛma dugukolo kan!…
[14] I ka i jigi da Matigi kan. I barika bonya ka i ja gɛlɛya. Ɔwɔ, i ka i jigi da Matigi kan.