[1] Dɔnkili dalaw kuntigi ka dɔnkili. Dawuda ka Zaburu. E Ala, ne bɛ i tanu ni dɔnkili ye, i kana i makun,
[2] k'a masɔrɔ mɔgɔ juguw ni nanbarakɛlaw ye u da yɛlɛ ne kama, ka nkalon da ne la.
[3] U ye ne lamini ni koniya kumaw ye, ka ne kɛlɛ k'a sɔrɔ kun t'a la.
[4] Hali ni ne bɛ u kanu, u bɛ ne koniya, ne tɛ se ka fɛn wɛrɛ kɛ delili kɔ.
[5] U ye ne ka ko ɲuman sara ni ko jugu ye, ka ne ka kanuya sara ni koniya ye.
[6] I ka ne jugu don mɔgɔ juguw bolo, Sitanɛ ka i jɔ a kinin yanfan fɛ.
[7] Ni a ka kiri tigɛra, a ka kɛ jalakitigi ye, a ka Ala delili ka jate jurumu ye.
[8] A si tilew ka dɔgɔya, mɔgɔ wɛrɛ ka a niyɔrɔ baara ta.
[9] A denw ka kɛ falatɔw ye, a muso ka kɛ muso cɛ salen ye.
[10] A denw ka fagu ka misirimaaya kɛ, u ka bɔ u ka so kolonw na ka taa dumuni fɛn ɲini yɔrɔ janw na.
[11] Tɔnɔ jugu juru kannibaa ka a bolo fɛnw bɛɛ minɛ. Dunanw ka a ka baara nɔ bɛɛ cɛ.
[12] A teri si kana ko ɲuman kɛ a ye tun, mɔgɔ si kana hinɛ a ka falatɔw la.
[13] A bɔnsɔn ka halaki ka bɔ dugukolo kan, a tɔgɔ ka ban bɔnsɔn nata cɛma.
[14] A bɛnbaw ka tilenbaliya ka to Matigi kɔnɔ, a ba ka jurumuw kana yafa.
[15] A ka fililiw ka to Matigi ɲɛ kɔrɔ tuma bɛɛ, Matigi ka a tɔgɔ jɔsi ka bɔ dugukolo kan,
[16] k'a masɔrɔ o mɔgɔ hakili ma to ko ɲuman kɛ la, nka a tugura faantan kɔlibaatɔ kɔ, ka mɔgɔ dusu kasilen tɔɔrɔ, ko a na o faga.
[17] Dangali kɛ tun ka di a ye, o danga ka bi a yɛrɛ kan. A tɛ dubaw kɛ fewu, duba yɔrɔ ka janya a la.
[18] Danga ka don a kan na i ko dulɔki, a ka don a kɔnɔ i ko ji, ka don a kolow la i ko tulu.
[19] A ka kɛ a fari la i ko fini, ka kɛ a cɛ sirilan ye tuma bɛɛ.
[20] O ka kɛ ne juguw sara ye Matigi fɛ, ani minw bɛ kuma juguw fɔ ne ni kama.
[21] Nka Matigi Ala, i ka hinɛ ne la, i tɔgɔba kosɔn, i ka ne kisi i ka makari kosɔn.
[22] Sabu ne ye faantan kɔlibaatɔ de ye, ne dusukun joginna ne kɔnɔ.
[23] Ne bɛ taa i ko ja bɛ taa cogo min na, ne taara i ko ntɔn.
[24] Ne senkuruw barika banna sun donni fɛ, ne farikolo fasara.
[25] Ne kɛra yɛlɛbɔ fɛn ye ne juguw fɛ. U bɛ ne filɛ ka u kun kɔmi.
[26] Ne Matigi Ala, i ka ne dɛmɛ, ka ne kisi i ka ɲumaya kosɔn,
[27] walisa u k'a dɔn ko e bolo de y'a kɛ, ko Matigi de ye ne kisi.
[28] U bɛ se ka dangali kɛ, nka e de bɛ duba kɛ. Ni u wulila ne kama, u na maloya, nka i ka baaraden na ɲagali.
[29] Ne juguw ka datugu dɔgɔyali fɛ, u ka maloya ka u datugu i ko dulɔkiba.
[30] Ne da na Matigi tanuli dɔnkili da, k'a tanu jamaba cɛma,
[31] k'a masɔrɔ a bɛ i jɔ faantan kinin yanfan fɛ, k'a tila a jalakibaaw la.