[1] Dɔnkili dalaw kuntigi ka dɔnkili. Dawuda ka Zaburu.
[2] Kira Natan taara a sɛgɛrɛ tuma min na, a donnen kɔ Bat-Seba fɛ.
[3] Ala, i ka hinɛ ne la i ka makari kosɔn. I ka ne ka tilenbaliya jɔsi ka bɔ yen i ka hinɛba kosɔn.
[4] I ka ne ka tilenbaliya bɛɛ ko ka bɔ ne la ka ne saniya ka bɔ ne ka jurumu la.
[5] K'a masɔrɔ ne bɛ ne ka tilenbaliya kow dɔn, ne ka jurumu bɛ ne ɲɛ kɔrɔ tuma bɛɛ.
[6] Ne ye e kelenpe de hakɛ ta ka ko jugu kɛ i ɲɛ kɔrɔ. O de y'a to ni i kumana, i tilennen na sɔrɔ. Ni i ye kiri tigɛ tuma min na, jalaki yɔrɔ si tɛna sɔrɔ i la.
[7] A filɛ, ne tilenbali bangera, ne ba ye ne jurumutɔ kɔnɔ ta.
[8] Nka e kɔni, i b'a fɛ ka tiɲɛ sɔrɔ mɔgɔ dusukun na, i ka hakilitigiya don ne dusukun na yɔrɔ dogolen na.
[9] I ka ne saniya ni hisope jiri fura ye, ni o kɛra, ne na saniya. I ka ne ko, ne na jɛya ka tɛmɛn kɔɔrimugu kan.
[10] I k'a to ne ka nisɔndiya niɲagali dɔnkilikan mɛn, walisa i ye kolo minw kari, olu ka ɲagali.
[11] I ka i ɲɛ bɔ ne ka jurumuw la, ka ne ka tilenbaliya kow bɛɛ jɔsi ka bɔ yen.
[12] Ala, i ka dusukun kura don ne kɔnɔ ka ne ni kuraya.
[13] I kana ne fili ka bɔ i ɲɛ kɔrɔ, i kana i Ni Senu bɔ ne la.
[14] I ka i ka kisili ɲagali kɛ ne kɔnɔ ka ne barika bonya ka dusukun ci duman di ne ma.
[15] Ni o kɛra, ne na tilenbaliyakɛlaw kalan i ka siraw la, jurumukɛlaw na segin i ma tun.
[16] Ala, ne Kisibaa Ala, i ka ne tila joli bɔnnen hakɛ la. O tuma la ne nɛnkun na i ka tilennenya ko fɔ niɲagali ye.
[17] Matigi, i ka ne da labila walisa ne da ka i tanu k'a jɛya.
[18] Sarakaw tɛ i nisɔndiya, ni o tɛ, ne tun na u bɔ i ye. Saraka jenitaw fana ko man di i ye.
[19] Saraka min ka di Ala ye, o ye dusukun nimisabaatɔ de ye. Ala, i tɛ ban mɔgɔ dusu kasilen nimisabaatɔ la.
[20] I ka ko ɲuman kɛ Sion ye i ka nɛɛma barika la ka Jerusalɛm kogow jɔ tun.
[21] O tuma la tilennenya sarakaw na diya i ye, saraka jenitaw ni saraka kɔrɔtataw bɛɛ. O tuma la u na nturaw kan tigɛ i ka saraka bɔlan kan.