[1] Dɔnkili dalaw kuntigi ka dɔnkili. Dawuda ka Zaburu.
[2] Matigi, masakɛ bɛɲagali i barika la. A bɛɲagali katuguni i ye se di a ma.
[3] I ye a dusukun na fɛn delilenw di a ma. A da tun ye fɛn minw deli, i ma ban ka olu di a ma. Sela.
[4] I ye a kunbɛn ni duba hinɛmaw ye, i ye sanu yɛrɛwolo masafugula don a kun na.
[5] A ye ɲɛnamaya deli i fɛ, i y'a di a ma. I ye si tile jan di a ma, dan tɛ min na.
[6] A nɔɔrɔ ka bon i ka kisili barika la. I ye a masiri ni saramaya ni bonya ye.
[7] I y'a kɛ dubaden ye badaa. I bɛ a faɲagali la i ɲɛ kɔrɔ.
[8] Ɔwɔ, masakɛ bɛ a jigi da Matigi kan, Kɔrɔtalenba ka makari barika la, foyi tɛna a lamaga.
[9] I bolo na se i juguw bɛɛ ma, i kininbolo na se i koniyabaaw bɛɛ ma.
[10] Ni i ye i jira tuma min na, i na u jeni tasumaba la, i ko gwantugu tasumaba. Matigi ka dimiyaba na u kunun, tasuma na u jeni ka u ban.
[11] I na u si tunun ka u ban ka bɔ dugukolo kan, ka u bɔnsɔn halaki ka bɔ Hadamadenw cɛma.
[12] U ye dabali jugu siri i kama, u ye mɔgɔ jugu labɛn, u tɛna se ka foyi kɛ,
[13] k'a masɔrɔ i n'a to u bɛɛ ka boli, i ye i ka kala sama u kama.
[14] Matigi, i ka wuli ni i barika bɛɛ ye. An na dɔnkili da ka i tanu i ka sebaaya kosɔn.