[1] Mɔgɔ tɔɔrɔlen barika dɛsɛlen ye delili kɛ k'a kɔnɔna kow bɛɛ fɔ Matigi ye k'a foori.
[2] Matigi, i ka ne ka delili lamɛn, ne kasikan ka se i ma.
[3] I kana i ɲɛda dogo ne la ne degun don na. I tulo majɔ ne kan na. Ni ne ye i tɔgɔ wele don min na, i ka ne jaabi joona,
[4] k'a masɔrɔ ne si tilew bɛ tɛmɛn ka tunun i ko sisi, ne kolow jenina i ko takami.
[5] Ne dusukun gosira, a jara i ko bin kɛnɛ jalen. Neɲinɛna dumuni yɛrɛ kɔ.
[6] Ne kolow nɔrɔlen bɛ ne sogo la, ne ka nwunan kosɔn.
[7] Ne bɔlen bɛ kungo kɔnɔ jumɛ fɛ, ne bɛ i ko tomon na gwingwin.
[8] Sunɔgɔ tɛ neɲɛ la, ne bɛ i ko cɔrɔnin min bɛ a kelen na so kun na.
[9] Ne juguw bɛ ne mafiɲɛya don o don, ne kɛlɛɲɔgɔnw bɛ ne tɔgɔ kɛ u ka dangali kɛ fɛn ye.
[10] Ne ye bugurijɛ kɛ ne ka dumuni ye, neɲɛji kolonsora ne ka minni ji la,
[11] o kɛra i ka dimiya ni i ka dusubɔ kosɔn, k'a masɔrɔ i ye ne minɛ ka ne fili yɔrɔ jan.
[12] Ne si tile bɛ i ko wula da fɛ suma, ne bɛ ja i ko bin kɛnɛ.
[13] Nka Matigi, e bɛ to masaya la badaa, bɔnsɔn nataw na i bonya badaa, badaa.
[14] I na wuli ka hinɛ Sion na. Nɛɛma di waati sera a ma, a waati sera,
[15] k'a masɔrɔ i ka baaradenw bɛ a kabakurunw kanu, a buguri hinɛ donna u la.
[16] O de kosɔn siyaw na siran Matigi tɔgɔɲɛ, dugukolo kan masakɛw bɛɛ na i nɔɔrɔ ye,
[17] k'a masɔrɔ Matigi na Sion jɔ ko kura, i nɔɔrɔ na kɛ a cɛɲɛ ye.
[18] A na a tulo majɔ mɔgɔ degunnen ka delili la, a tɛna ban a ka delili ma.
[19] O na sɛbɛn bɔnsɔn nataw bɛɛ ye, siya min na da, o na Matigi tanu.
[20] Ka Matigi to sankolo kɔnɔ, a ye a ɲɛ majigin ka filɛli kɛ, k'a to a ka yɔrɔ senuma la, a ye a ɲɛ majigin ka dugukolo filɛ,
[21] walisa a ka kasola mɔgɔw nwunankan mɛn, minw bɛ ɲini ka sa, a ka olu tila.
[22] Ni mɔgɔw ni masayaw bɛɛ ye ɲɔgɔn lajɛ ka baara kɛ Matigi ye tuma min na, o tuma la Matigi tɔgɔ na bonya Sion, a tanuli dɔnkili na da Jerusalɛm.
[24] Ala ye ne barika dɔgɔya ne ka kamalenya cɛmancɛ la, ka dɔ bɔ ne si tile la.
[25] Ne ko: «Ala, e min si sanw tɛ ban, i kana ne ni minɛ ne si tilew cɛmancɛ la.
[26] I ye dugukolo da ka kɔrɔ, sankolo ye i bolo baara nɔ ye.
[27] Olu na ban, nka i bɛ to. U bɛɛ na kɔrɔ i ko fini. I na u yɛlɛma i ko dulɔki, u na tɛmɛn.
[28] Nka e bɛ cogo kelen na tuma bɛɛ, i si sanw tɛ ban.
[29] I ka jɔndenw na sigi yɔrɔɲuman sɔrɔ, u bɔnsɔn na to i ɲɛ kɔrɔ badaa.»