[1] Dɔnkili dalaw kuntigi ka dɔnkili, Jedutun cogo la. Dawuda ka Zaburu.
[2] Ne ni lafiyalen bɛ Ala kelenpe fɛ. Ne ka kisili bɛ na ka bɔ ale la.
[3] Ale kelenpe ye ne ka farakurun ni ne kisibaa ye. Ne marabaa don, ne tɛna lamaga.
[4] Aw na to ka bi mɔgɔ kan fo tuma jumɛn? Aw b'a fɛ ka a halaki wa ka a labi i ko kogo jɛngɛnen wala lamini sinsan min bɛna bi?
[5] U tɛ miiri foyi la fɔ ka a labi, ka bɔ a ka bonya la. U y'a jɔ nkalontigɛlaw cɛma. U bɛ dubaw kɛ u da la nka u bɛ dangali kɛ u dusukun na. Sela.
[6] Ɔwɔ, mɔgɔ ni bɛ lafiya sɔrɔ Ala kelenpe fɛ, k'a masɔrɔ ne jigi bɛ ale kan.
[7] Ale kelenpe ye ne ka farakurun ni ne kisibaa ye, ne marabaa don, foyi tɛna ne lamaga.
[8] Ne bɛ ne ka kisili ni ne nɔɔrɔ makɔnɔ ka bɔ Ala fɛ. Ala ye ne ka farakurun barikama ni ne dogo yɔrɔ ye.
[9] Siyaw, a' ye aw kalifa ale ma tuma bɛɛ, ka aw kɔnɔna kow bɛɛ fɔ a ye k'a foori. Ala ye an dogo yɔrɔ ye. Sela.
[10] Sɛbɛ la, mɔgɔ gwansanw ye fuu ye, mɔgɔ tɔgɔbaw ye nkalontigɛlaw ye. Ni u bilara sumanikɛ ja la, u na yɛlɛn. U bɛɛ lajɛlen ka fiɲɛ ni fiɲɛ ye.
[11] I kana i jigi da mɔgɔ farinmaw kan, i kana i jigi da sonyalikɛlaw kan, olu ye jigi fuu de ye. Ni nafolo jiidira, i kana i jigi da o kan.
[12] Ala y'a fɔ siɲɛ kelen, ne y'a kan mɛn ko kura ko: «Sebaaya ye Ala ta ye.»
[13] Matigi, makari fana ye i ta ye. I na mɔgɔ bɛɛ kelen-kelen sara ka kɛɲɛ ni u ka kɛwalew ye.