[1] Dawuda ka delili. Matigi, i tulo majɔ ne ka tilennenya kuma la, ka i janto ne kasikan na. I tulo majɔ ne ka delili la, a bɛ bɔ dawolo jɛlenw na.
[2] I yɛrɛ da ka ne ka kiri tigɛ. I ɲɛ ka ne ka jɛlenya ye.
[3] I ye ne dusukun sɛgɛsɛgɛ ka na bɔ ne ye su fɛ. I ye ne sɛgɛsɛgɛ, i ma foyi ye ne la. Ne dala kuma ni ne ka miirili kɛra kelen ye.
[4] Ne ye mɔgɔw ka kɛtaw ye, nka ne ye i dala kuma kan minɛ. Ne ye ne mabɔ mɔgɔ farinmaw ka siraw la.
[5] I ka ne senw barika bonya i ka siraw kan, walisa ne senw kana cɛɛnɛ.
[6] Ala, ne ye i tɔgɔ wele, k'a masɔrɔ i ye ne jaabi. I tulo majɔ ne ka kuma la ka ne ka delili lamɛn.
[7] I ka i ka makari kabakoma jira. Mɔgɔ minw bɛ u kalifa i ma, i bɛ olu kisi ni i kininbolo ye ka u tila u juguw la.
[8] I ka ne mara i ko i yɛrɛɲɛkisɛ, ka ne dogo i kaman suma kɔrɔ.
[9] Mɔgɔ jugu minw bɛ ne tɔɔrɔ, i ka ne kisi olu ma, ani ne jugu minw bɛ ne lamini.
[10] Hinɛ tɛ u la fewu, u da bɛ kuncɛbaya kumaw fɔ.
[11] U tugura an nɔ fɛ ka an lamini. U bɛ cogo ɲini ka an labi.
[12] U bɔlen bɛ waraba kɔngɔtɔ sogo ɲinitɔ fɛ, warabaden min bɛ i merun yɔrɔ dogolen na.
[13] Matigi, i ka wuli ka mɔgɔ jugu kunbɛn k'a labi. I ka ne tila a la ni i ka npan ye.
[14] Matigi, i bolo ka ne tila mɔgɔ juguw la, nin waati mɔgɔw kɔni. U niyɔrɔ dan ye nin diɲɛ ye, i bɛ u kɔnɔ fa ni i ka nafolo ye. U denw fara, olu bɛ u bolo fɛnw to u mɔdenw bolo u kɔ.
[15] Nka ni ne kununna tuma min na, ne na i ɲɛda ye tilennenya la. I yɛrɛ filɛli na ne wasa.