[1] Dɔnkili dalaw kuntigi ka dɔnkili. «I kana halakili kɛ.» Dawuda ye o dɔnkili da a boli tuma la Saul ɲɛ ka taa i dogo kuluwo kɔnɔ.
[2] I ka makari ne la, Ala, i ka makari ne la, k'a masɔrɔ ne bɛ i ɲini ka kɛ ne ni dogo yɔrɔ ye. Ɔwɔ, ne bɛ ne dogo i kaman kɔrɔ, fo nin bɔnɛ kow ka tɛmɛn.
[3] Ne bɛ kasi Ala Kɔrɔtalenba nɔ fɛ. Sebaayabɛɛtigi Ala na ne mara.
[4] A na a ka kisili ci ne ma ka bɔ sankolo la, hali k'a sɔrɔ ne tɔɔrɔbaaw bɛ ne cɔngɔ u sen kɔrɔ. Sela. Ɔwɔ, Ala na a ka nɛɛma ni a ka dɛmɛniba ci ne ma.
[5] Ne ni bɛ warabaw cɛma, mɔgɔ minw bɛ tasuma mana bɔ u da fɛ, ne sigilen bɛ olu cɛma. U ɲinw ye tamaw ni biɲɛw de ye, u nɛnkun ye npan da duman ye.
[6] Ala, i ka i kɔrɔta sankolow san fɛ. I nɔɔrɔ ka dugukolo yɔrɔw bɛɛ fa.
[7] U ye jan da ne senɲɛ, ne dusu bɛ lamaga. U ye dingɛ sen neɲɛ, u yɛrɛw bira o kɔnɔ. Sela.
[8] Ala, ne dusukun lafiyalen don, ɔwɔ, ne dusukun lafiyalen don. Ne na dɔnkili da, ɔwɔ, ne na tanuli dɔnkili da.
[9] Ne dusu, i ka kunun. A' ye wuli, ne ka file ni ne ka nkɔni. Ne yɛrɛ na kunun sani kɛnɛ ka tigɛ.
[10] Matigi, ne na i tanu mɔgɔw cɛma, ne na i tanuli dɔnkili da siyaw cɛma,
[11] k'a masɔrɔ i ka ɲumaya bɛ se fo sankolo la, i ka kantigiya bɛ tɛmɛn kabasenw kan.
[12] Ala, i ka i kɔrɔta sankolow san fɛ. I nɔɔrɔ ka dugukolo yɔrɔw bɛɛ fa.