[1] Aw ka Matigi tanu! Aw ka Matigi tanu ka barika da a ye, k'a masɔrɔ a ka ɲi. A ka makari bɛ to badaa.
[2] Jɔn bɛ se ka Matigi ka sebaaya kɛlenw lakali k'a tanuli kow bɛɛ lakali?
[3] Mɔgɔ minw bɛ tilennenya mara ka ko tilennenw kɛ, olu ye dubadenw ye.
[4] Matigi, i ka i hakili to ne la, e min bɛ ko ɲumanbaw kɛ i ka mɔgɔw ye, i ka na i ka kisili di ne ma,
[5] walisa ne ka niyɔrɔ sɔrɔ hɛrɛ la i kaɲɛnatɔmɔlenw cɛma, ka ɲagali i ka mɔgɔw ɲagali ko la, ka ne bonya i taw fɛ.
[6] An ni an bɛnbaw ye jurumu kɛ, an ye ko jugu kɛ, an jalakilen don.
[7] An bɛnbaw ma kɔlɔsili kɛ i ka taamashyɛnw la ka u to Misira. U ma u hakili to i ka ɲumayaba kɛlenw na, nka u murutira kɔgɔji da la, Kɔgɔji Bilen yɛrɛ da la.
[8] O bɛɛ n'a ta Ala ye u kisi a yɛrɛ tɔgɔ kosɔn, walisa k'a ka sebaaya jira.
[9] A ye Kɔgɔji Bilen kɔrɔfɔ, o jara. A ye u ɲɛ minɛ ka ji dunba cɛ tigɛ, i ko kungokolon bɛ cɛ tigɛ cogo min na.
[10] A ye u tila ka bɔ u juguw bolo, ka u tila u la ɲinibaa la.
[11] Jikuruw ye u tɔɔrɔbaaw datugu, hali olu la kelen ma kisi.
[12] O tuma la u dara Ala ka layidu la, ka a tanuli dɔnkili da.
[13] A ma mɛn, u ɲinɛna a ka kabakow kɔ, u ma a ka ko latigɛlenw makɔnɔ.
[14] U samana u nege juguw nɔ fɛ kungokolon kɔnɔ ka Ala kɔrɔbɔ yen.
[15] O tuma la Ala ye u ka fɛn delilen di u ma, nka a ye bana jugu bila u la.
[16] Ka u to u ka daga la, Musa keleya donna u la, ani Matigi ka senuma Aron.
[17] Dugukolo y'a da yɛlɛ ka Datan kunun, k'a da tugu Abiram ka kɛlɛbolo da la.
[18] Tasuma ye u ka kɛlɛbolo jeni ka u ban, tasuma mana ye mɔgɔ juguw jeni.
[19] U ye sanu kɛ misiden ye Hɔrɛb, ka u biri ja dilalen kɔrɔ.
[20] Ala min tun ye u nɔɔrɔ ye, u ye o falen bin dun misi ja la.
[21] U ɲinɛna u tilabaa Ala kɔ, o min ye kabakow kɛ Misira,
[22] ka kabakow kɛ Kam ka jamana kɔnɔ, ka kabako taamashyɛnw kɛ Kɔgɔji Bilen da la.
[23] O de kosɔn Ala ko a na u halaki, nka a kaɲɛnatɔmɔlen Musa donna mɔgɔw ni Ala cɛ, ka Ala ka dimiya dabila walisa a kana u halaki.
[24] U ye jamanaɲuman lagosi, u ma sɔn ka da Ala ka layidu la.
[25] U ye dajukɔrɔ kuma fɔ u ka finisow kɔnɔ, u ma sɔn ka Matigi kan lamɛn.
[26] O de kosɔn a y'a kali u ye ko a na u bila u ka sa kungokolon kɔnɔ,
[27] k'a to u bɔnsɔn ka faga siya wɛrɛw cɛma, ka u jɛnsɛn jamanaw bɛɛ kɔnɔ.
[28] U tugura Bal-Peor la ka su sɔn fɛnw dun.
[29] U ye Ala dusu bɔ ni u ka ko jugu ye, o de kosɔn saya sera u ma.
[30] Nka Fineɛs wulila ka delili kɛ, fiɲɛbana jɔra.
[31] O jatera a ye tilennenya ye, bɔnsɔn nataw bɛɛ la.
[32] U ye Matigi ka dimiya lawuli Mɛriba jiw yɔrɔw la fana. Musa tɔɔrɔla u kosɔn.
[33] A diminna u kɔrɔ, o de kosɔn a ye kuma bɛnbali fɔ.
[34] U ma o jamana kɔnɔ mɔgɔw faga, i ko Matigi tun y'a fɔ u ye cogo min na,
[35] nka u ni siya wɛrɛw ɲaamina ɲɔgɔn na, u ye olu ka ko kɛtaw kɛ.
[36] U ye olu ka boliw bato, o kɛra u minɛli jan ye.
[37] U ye u denkɛw ni u denmusow kɛ saraka fagataw ye jinɛw ye.
[38] U ye joli jalakibali bɔn, u denkɛw ni u denmusow joli kɔni. U ye olu kɛ sarakaw ye Kanan jamana boliw ye. Jamana nɔgɔra olu joli fɛ.
[39] U y'u yɛrɛw nɔgɔ ni u ka tilenbaliya kow ye, ka kɛ kanbilabaaw ye u taama cogo jugu kosɔn.
[40] O de kosɔn Matigi dusu bɔra a ka mɔgɔw kɔrɔ. A ɲiginna a ka ciyɛn na.
[41] A ye Israɛl bɔnsɔn don siyaw bolo, olu ye u koniya ka u fanga digi u la.
[42] U juguw ye u tɔɔrɔ, u kolola u juguw ye.
[43] Matigi ye u tila siɲɛ caman, nka u murutira ka u yɛrɛw sago kɛ. U majiginna u yɛrɛw ka fililiw kosɔn.
[44] O bɛɛ n'a ta a ye u kasikan mɛn tuma min na, ka u to u ka tɔɔrɔ la,
[45] a ye a hakili to a ka layidu la u ye, a hinɛna u la ka kɛɲɛ ni a ka makariba ye.
[46] Mɔgɔ minw taara ni u ye jɔnya la, a y'a to olu bɛɛ ka hinɛ u la.
[47] An Matigi Ala, i ka an kisi, ka an lajɛ yɔrɔ kelen na ka bɔ siyaw cɛma, walisa an ka i tɔgɔ senuma bonya ka ɲagali i tanuli la.
[48] Matigi, Israɛl ka Ala ka tanu badaa badaa. Mɔgɔw bɛɛ k'a fɔ ko: «Amiina.» Aw ka Matigi tanu.