[1] Dɔnkili dalaw kuntigi ka dɔnkili min dara gitit la. Korɛ denkɛw ka Zaburu.
[2] Sebaayabɛɛtigi Matigi, i sigi yɔrɔ ko ka di ne ye.
[3] Ne ni barika bannen don Matigi ka soɲɛnafin kosɔn. Ne dusukun ni ne farisogo bɛ kasi Ala ɲɛnama nɔ fɛ.
[4] Matigi, Sebaayabɛɛtigi, ne ka Masakɛ ni ne ka Ala. Hali cɔrɔnin bɛ soɲuman sɔrɔ, nanagalen bɛɲaa da k'a denw bila o kɔnɔ i ka saraka bɔlanw kɔrɔ.
[5] Minw bɛ sigi i ka so kɔnɔ, olu ye dubadenw ye. Olu bɛ i tanu tuma bɛɛ. Sela.
[6] Mɔgɔ min barika ye e ye, o tigi ye dubaden ye. I ka so taali sira ko ka di min ye, o ye dubaden ye.
[7] Ni u ye Baka jɛkɛnɛ cɛ tigɛ, a bɛ kɛ ji boyi yɔrɔ ye. Sanji kunnaw bɛ a datugu ni dubaw ye.
[8] U taatɔ, u barika bɛ bonya, walisa u ka u jɔ Ala ɲɛ kɔrɔ Sion.
[9] Matigi, Sebaayabɛɛtigi Ala, i ka ne ka delili lamɛn. Yakuba ka Ala, i tulo majɔ. Sela.
[10] E Ala, i ka an ka nɛgɛ bɛnnan filɛ, i ka i ɲɛ jɔ i kaɲɛnatɔmɔlen na.
[11] Ɔwɔ, ka tile kelen kɛ i ka batosoba kɔnɔ, o ka fisa tile waa kelen kɛli ye yɔrɔ wɛrɛ la. Matigi ka so da la jɔli ka di ne ye ka tɛmɛn mɔgɔ juguw ka finiso kɔnɔ sigili kan.
[12] Ɔwɔ, Matigi Ala ye tile ni nɛgɛ bɛnnan de ye, Matigi bɛ nɛɛma ni nɔɔrɔ di. Minw bɛ tilennenya sira taama, a tɛna olu jɛ fɛnɲuman si la.
[13] Matigi, Sebaayabɛɛtigi, mɔgɔ min jigi dalen bɛ i kan, o ye dubaden ye.