[1] Dɔnkili dalaw kuntigi ka dɔnkili, terebente sunw na ntubanni ko la. Dawuda ye o dɔnkili da a minɛ tuma la Filisitikaw fɛ Gat.
[2] Ala, i ka makari ne la k'a masɔrɔ mɔgɔw bɛ girin ne nɔ fɛ. U bɛ tila ka ne kɛlɛ ka ne tɔɔrɔ.
[3] Ne juguw bɛ girin ne nɔ fɛ don o don ko u bɛ ne faga. Minw bɛ u yɛrɛw bonya ka ne kɛlɛ, olu ka ca.
[4] Ni ne siranna tuma min na, ne na ne jigi da i kan.
[5] Ne na Ala tanu a ka kuma fɔlen kosɔn. Ne ye ne jigi da Ala kan, ne tɛna siran foyiɲɛ. Mɔgɔ sata bɛ se ka mun kɛ ne la?
[6] U bɛ tile ka ne ka kumaw yɛlɛma, u bɛ ko jugu dama miiri ne kama.
[7] U bɛ ɲɔgɔn lajɛ ka u dogo ka ne sen nɔw kɔlɔsi, k'a masɔrɔ u b'a fɛ ka ne faga.
[8] Juguya na u kisi wa? Ala, i diminnenba ka o mɔgɔw halaki.
[9] I bɛ ne ka kunfɛtaa cogo bɛɛ kɔlɔsi ka neɲɛji mara minan kɔnɔ. U sɛbɛnnen tɛ i ka kitabu kɔnɔ wa?
[10] Ni ne ye i tɔgɔ wele don min na, ne juguw na u mabɔ. Ne y'a dɔn ko Ala bɛ ne fɛ.
[11] Ne na Ala tanu a ka kuma fɔlen kosɔn. Ɔwɔ, ne na Matigi tanu a ka kuma fɔlen kosɔn.
[12] Ne ye ne jigi da Ala kan, ne tɛna siran foyiɲɛ. Mɔgɔ sata bɛ se ka mun kɛ ne la?
[13] Ala, ne ye dafale min kɛ i la, ne ka kan ka o bɔ. Ne na barika dali saraka bɔ i ye.
[14] K'a masɔrɔ i ye ne kisi saya ma ka ne sen kisi bili ma, walisa ne ka taama Ala ɲɛ kɔrɔ ɲɛnamaya kɛnɛyeelen na.