[1] Asaf ka Zaburu. Dɔnkili.
[2] Ala, i kumabali kana to, i makunnen kana to, i kana i lafiya.
[3] A filɛ, i juguw bɛ poroporoli kɛ, i koniyabaaw ye u kun kɔrɔta.
[4] U ye jɛ siri i ka mɔgɔw kama. I bɛ minw kɔlɔsi, u bɛɲɔgɔn ye olu kama.
[5] U ko: «An ka u halaki ka u ban ka bɔ siyaw cɛma, walisa mɔgɔ si hakili kana jigin Israɛl tɔgɔ la tun.»
[6] U ye jɛ siri ni miirili kelen ye ka layidu taɲɔgɔn ye i kama,
[7] Edɔmkaw ni Isumaɛl bɔnsɔn ni Moab bɔnsɔn ni Hagar bɔnsɔn
[8] ni Gebalkaw ni Amɔn bɔnsɔn ni Amalɛk bɔnsɔn ni Filisitikaw ni Tirkaw,
[9] Asirikaw fana donna u ka jɛ la, ka Lɔti bɔnsɔn dɛmɛ. Sela.
[10] I ye min kɛ Madiankaw la ka kɔrɔ, i ka o ɲɔgɔn kɛ u la, i ye min kɛ Sisera ni Jabɛn na Kison ba da la, i ka o ɲɔgɔn kɛ ninw fana la.
[11] U fagara En-Dor, u suw kɛra dugukolo nɔgɔ ye.
[12] I ka u ka faamaw kɛ i ko Orɛn ni Zeɛb, ka u ka kuntigiw bɛɛ kɛ i ko Zeba ani Zalmuna,
[13] k'a masɔrɔ u ko: «An ka Ala sigi yɔrɔw bɛɛ minɛ ka kɛ an ta ye.»
[14] Ne ka Ala, i ka u kɛ i ko fununfunun la gwangwan, ka u kɛ i ko nwɛɲɛ min bɛ taa fiɲɛ fɛ,
[15] ka u kɛ i ko tasuma bɛ kungokolon jeni cogo min na, i ko tasuma mana bɛ yɛlɛn kuluw san fɛ cogo min na.
[16] I ka u nɔgɛn ni i ka fiɲɛba ye, ka u ja tigɛ ni i ka sanji barikama ye.
[17] Matigi, i ka u kunna siri ni maloya ye walisa u ka i ɲini.
[18] U ka maloya ka siran tuma bɛɛ, maloya ka u kunna siri ka u halaki,
[19] walisa u k'a dɔn ko i kelenpe ye Matigi ye, ko i ye Kɔrɔtalenba ye dugukolo yɔrɔw bɛɛ kun na.