[1] Dawuda ka Zaburu. Ne bɛ barika da Matigi ye. Ne bɛ Matigi tɔgɔ senuma tanu ni ne dusukun bɛɛ ye.
[2] Ne dusu, i ka barika da Matigi ye, i kana ɲinɛ a ka ko ɲuman kɛlen si kɔ.
[3] Ale de bɛ i ka tilenbaliya kow bɛɛ yafa i ma, ka i ka banaw bɛɛ kɛnɛya.
[4] A bɛ i ni kunmabɔ kaburu ma, ka ɲumaya ni hinɛ kɛ masafugula ye i kun na.
[5] I kɔrɔyalen, a bɛ i wasa fɛnɲumanw la, a bɛ i ka kamalenya kuraya, walisa i barika ka bonya i ko bɔn panta ta.
[6] Matigi bɛ tilennenya kow kɛ ka jo di mɔgɔ tɔɔrɔlenw ma.
[7] A y'a ka siraw jira Musa la, k'a ka sebaaya jira Israɛl bɔnsɔn na.
[8] Matigi ye makaritigi hinɛma ye. A tɛ dimin joona, a ka ɲumaya ka bon.
[9] A tɛna jalakili kɛ tuma bɛɛ, a diminnen tɛna to kudayi.
[10] A ma an tɔɔrɔ ka kɛɲɛ ni an ka jurumuw ye, a ma an kolo ka kɛɲɛ ni an ka tilenbaliya kow ye.
[11] A bɛ makari min kɛ a ɲɛsiranbaaw la, o ka bon, o bɛ sankolo ni dugukolo cɛ janya bɔ.
[12] Kɔrɔn ni tilebi ka janɲɔgɔn na cogo min na, a ye an ka fililiw mabɔ an na ten.
[13] Fa bɛ hinɛ a denw na cogo min na, Matigi bɛ hinɛ a ɲɛsiranbaaw fana la ten,
[14] k'a masɔrɔ a bɛ an dila cogo dɔn, a y'a dɔn ko an ye buguri ye.
[15] Hadamaden si tile bɛ i ko bin, a bɛ bonya ka nɔɔrɔ sɔrɔ i ko bin feere.
[16] Ni fiɲɛ cira, a tɛ ye tun, a tun bɛ yɔrɔ min na, o tɛ dɔn tun.
[17] Nka Matigi ka ɲumaya bɛ to a ɲɛsiranbaaw kan, tuma bɛɛ ni waati bɛɛ la. A ka tilennenya bɛ to u denw ta denw kan,
[18] olu minw bɛɛ bɛ a ka layidu mara, ka u hakili to a ka ci fɔlenw na ka u kɛ.
[19] Matigi ye a ka masasigilan sigi sankolo la. A sigilen bɛ fɛn bɛɛ kun na.
[20] Matigi ka mɛlɛkɛ, cɛ farin barikamaw, aw minw bɛ a ka ci fɔlenw kɛ, k'a kan minɛ, a' ye Matigi tanu.
[21] Aw kɛlɛbolo minw bɛ Matigi ka baara la k'a sago kɛ, aw ka Matigi tanu.
[22] Matigi ka dafɛn, minw bɛɛ bɛ a ka mara fan bɛɛ la, aw ka Matigi tanu. Ne dusu, i ka Matigi tanu.