[1] Dɔnkili dalaw kuntigi ka dɔnkili, denkɛ saya ko la. Dawuda ka Zaburu.
[2] Ne na barika da Matigi ye ni ne dusukun bɛɛ ye, ne na i ka kabakow bɛɛ lakali.
[3] Ne na nisɔndiya ka ɲagali i la, ne na i tɔgɔ da dɔnkili la, Ala Kɔrɔtalenba.
[4] Katuguni ne juguw seginna kɔ, u bira ka sa i ɲɛ kɔrɔ.
[5] Ɔwɔ, i ye jo di ne ma ka ne lafasa. I sigilen bɛ i ka masasigilan kan ka kiri tilennen tigɛ.
[6] I ye siyaw jalaki ka mɔgɔ juguw halaki. I ye u tɔgɔ jɔsi ka bɔ yen badaa.
[7] I juguw si tɛ yen, u halakira badaa. I ye dugu minw ci, olu ko bɔra mɔgɔw kɔnɔ ka ban.
[8] Matigi bɛ to masaya la badaa. A ye a ka masasigilan sigi kiri kama.
[9] A na kiri tigɛ diɲɛ bɛɛ kan ni tilennenya ye, a na kiri tigɛ mɔgɔw kan ni tiɲɛ ye.
[10] Matigi na kɛ mɔgɔ degunnen dogo yɔrɔ ye, ka kɛ a dogo yɔrɔ ye tɔɔrɔ tuma la.
[11] Matigi, mɔgɔ minw bɛ i tɔgɔ dɔn, olu na u kalifa i la, k'a masɔrɔ minw bɛ i ɲini, i tɛna olu bila abada.
[12] Aw ka tanuli dɔnkili da Matigi ye, o min sigilen bɛ Sion. A' ye a ka ko kɛlen nɔɔrɔma lakali siyaw cɛma.
[13] Katuguni ale min bɛ ɲininkali kɛ joli hakɛ ko la, a hakili bɛ u la, a tɛnaɲinɛ faantanw kasikan kɔ.
[14] Matigi, i ka hinɛ ne la. Ne koniyabaaw ye ne sɛgɛn cogo min na, i ka o filɛ, e min ye saya konw dayɛlɛ ka bɔ ne da la,
[15] walisa ne ka i tanuli welewele da, Sion denmuso ka daw la. Ne na ɲagali i ka kisili ko la.
[16] Siyaw bira u yɛrɛw ka dingɛ sennenw kɔnɔ. U senw minɛna u yɛrɛ ka jan dogolenw na.
[17] Matigi ye a yɛrɛ jira, a y'a ka tilennenya kow welewele da. Mɔgɔ juguw minɛna u yɛrɛw ka juru dalenw na. Fɔlifɛnw ka dɔnkili. Sela.
[18] Mɔgɔ juguw bɛ taa lahara, ani siya minw bɛɛ bɛ ɲinɛ Ala kɔ.
[19] Ɲinɛ tɛna kɛ mɔgɔ tɔɔrɔlen kɔ abada, mɔgɔ degunnen jigi tɛna tigɛ tuma bɛɛ.
[20] Matigi, i ka wuli. Mɔgɔ kana se sɔrɔ. Kiri ka tigɛ siyaw kan i ɲɛ kɔrɔ.
[21] Matigi, i ka ja tigɛ bila u la. Mɔgɔw k'a dɔn ko u tɛ fɛn wɛrɛ ye Hadamaden kɔ. Sela.