[1] Aw ka Matigi tanu, k'a masɔrɔ a ka ɲi ka tanuli dɔnkili da an ka Ala ye. Ɔwɔ, a tanuli bɛnnen bɛ, a ka ɲi.
[2] Matigi bɛ Jerusalɛm jɔ ko kura, ka Israɛl mɔgɔ jɛnsɛnnenw lajɛɲɔgɔn kan.
[3] A bɛ mɔgɔ dusukun joginnenw kɛnɛya, ka u jogindaw siri.
[4] Ale bɛ dolow dama dɔn, a bɛ tɔgɔ da u bɛɛ kelen-kelen na.
[5] An Matigi ka bon, a ka sebaaya ka bon, dan tɛ a hakili la.
[6] Matigi b'i janto mɔgɔ majiginnenw na ka u kɔrɔta, a bɛ mɔgɔ juguw majigin fo duguma.
[7] Aw ka Matigi tanuli dɔnkili da, ka tanuli dɔnkili da an ka Ala ye ni nkɔni ye.
[8] Ale de bɛ san fin, ka sanji labɛn dugukolo ye. A bɛ bin falen kuluw kan.
[9] A bɛ dumuni di baganw ma, ni nkankan kɔnɔdenw bɛ kasi kɔngɔ bolo, a bɛ dumuni di u ma.
[10] Yɛlɛnkan so barika tɛ Ala nisɔndiya, kɛlɛkɛ cɛ barikama tɛ a diyaɲe fɛn ye.
[11] Matigi diyaɲe fɛn ye a ɲɛsiranbaaw ye, olu minw jigi dalen bɛ a ka ɲumaya kan.
[12] Jerusalɛm, i ka Matigi tanu, Sion, i ka barika da Ala ye,
[13] k'a masɔrɔ ale de ye i donda la konw balabalaw barika bonya ka duba i denw ye i kɔnɔ.
[14] A bɛ hɛrɛ kɛ i ka jamana kɔnɔ ka i balo ni alikama bɛɛ la ɲuman ye.
[15] A bɛ a ka ci fɔlen lase dugukolo kan, a ka kuma sen ka tɛli.
[16] A bɛ neje bi i ko sagasi jɛma, a bɛ bugun da i ko bugurijɛ.
[17] A bɛ sanbɛlɛnin kerun i ko bɛlɛkisɛ, jɔn bɛ se ka a ka nɛnɛ muɲu?
[18] Ni a ye ci di, u bɛ yeele, ni a ye a dafiɲɛ ci, ji bɛ daminɛ ka woyo.
[19] A b'a ka kuma jira Yakuba la, ka a ka ko latigɛlenw ni a ka ci fɔlenw di Israɛl ma.
[20] Siya minw ma a ka sariyaw dɔn, a ma o ɲɔgɔn kɛ olu si ye. Aw ka Matigi tanu.