<Зәбур 91

[1] Йе бьн һешийа Йе Һәри Жорьнда дьминә, әw бьн сийа Йе Һәри Зорда р'ьһ'әт дьбә.

[2] Әзе бежьмә Хӧдан: «Сьт'аргәһа мьн у кәла мьн, Хwәдейе мьн, к'ижанида әз гӧман ьм!»

[3] Әwе тә жь т'әләка неч'ирван хьлаз кә, жь нәхwәшийа мьрьне.

[4] Әwе пе п'әр'е Хwә тә бьньхемә, бьне баске Wида те бьсьт'ьри, р'астийа Wийе тәр'а бьбә мәрт'ал у сур.

[5] Те жь саwа шәве нәтьрси, нә жь тира кӧ р'оже дьфьр'ә,

[6] нә жь нәхwәшийа мьрьнейә, кӧ тә'ристанийеда дьгәр'ә, нә жи жь wе дәрбе, кӧ р'о нава р'ожеда гәвәр дькә.

[7] Һәгәр һ'әзар алийе тәйи ч'әпева бьк'әвьн, дәһә һ'әзар кәс жи, алийе тәйи р'астева, ле бәле дәрбәке нәгьһижә тә.

[8] Т'әне те бь ч'ә'ве хwә т'әмашә ки у бәлайе нәп'ака бьбини.

[9] Тә Хӧдан хwәр'а кьрә сьт'аргәһ, Йе Һәри Жорьн һеwаргәһ,

[10] ләма т'ӧ хьрабийе нәйе сәре тә у т'ӧ qәзийе незики коне тә нәбә.

[11] Чьмки wе т'әмийа тә бьдә мьлйак'әтед Хwә, кӧ һ'әму р'е-дьрбед тәда тә хwәй кьн.

[12] Әwе тә сәр дәста һьлгьрьн, кӧ ньгед тә кәвьр нәк'әвьн .

[13] Те шер у мә'ре тәйар п'епәс ки у щәwрькед wан бьһ'ьнщьр'ини .

[14] Хwәде дьбежә: «Әw Мьн һ'ьз дькә, Әзе жи wи хьлаз кьм, Әзе пьштоване wи бьм, чьмки наве Мьн нас дькә.

[15] Әwе гази Мьн кә, Әзе щаба wи бьдьм, тәнгасийеда Әзе т'әви wи бьм, Әзе wи хьлаз кьм у бьльнд кьм.

[16] Әзе wи р'ожед дьрежва т'ер кьм у азадийа Хwә нишани wи кьм».