<Зәбур 51

[1] Мьн wәрә р'ә'ме, Хwәде, wәкә амьнийа Хwә, wәкә һ'ӧба Хwәйә п'ьр', беолитийед мьн р'әсит кә.

[2] Мьн лап бьшо жь нәһәqийед мьн у мьн паqьж кә жь гӧнәйед мьн.

[3] Чьмки беолитийед хwә әз нас дькьм у гӧнәйе мьн т'ьме ль бәр мьн ә.

[4] Ль бәр Тә, т'әне һьмбәри Тә мьн гӧнә кьр у хьраби ль бәр ч'ә'ве Тә кьр, ӧса кӧ Тӧ р'аст и qьрара Хwәда у паqьж и һ'акьмтийа Хwәда .

[5] Бәле әзи нәһәqийева дьне к'әтьмә әз жь зькмакийеда гӧнәк'ар бумә.

[6] Бәле Тӧ р'астийе дьле мьнда дьхwази. Дьле мьн к'ур һини сәрwахтийе кә.

[7] Паqьж кә мьн пе зохе һусопе, әзе паqьж бьм у бьшо мьн, жь бәрфе әзе qәрqаштьр бьм.

[8] Дәнге әшqе у шабуне Тӧ бьгьһинә мьн, бьра ша бьн һәстуйед кӧ Тә шкенандьн.

[9] Тӧ пьшта Хwә бьдә гӧнәйед мьн у р'әсит кә һ'әму нәһәqийед мьн.

[10] Хwәде, дьләки паqьж нав мьнда бьә'фьринә у р'ӧһ'әки р'аст нав мьнда сәр һәвда бинә.

[11] Тӧ мьн жь бәр Хwә нәвежә у Р'ӧһ'е Хwәйи Пироз жь мьн нәстинә.

[12] Шабуна хьлазкьрьна Хwә ль мьн вәгәр'инә у бь р'ӧһ'әки р'ази мьн бьнгәһ кә.

[13] Р'ийед Тә әзе беола һин кьм у гӧнәк'аре сәр Тәда вәгәр'ьн.

[14] Мьн хьлаз кә Хwәде жь хунр'етьне, Тӧ Хwәдейе мьни хьлазбуне, зьмане мьне бьдә пәсьне һәqийа Тә.

[15] Хwәйо, левед мьн Тӧ жь һәв вәкә у дәве мьне р'умәта Тә бьльнд кә.

[16] Чьмки Тӧ qӧрбана нахwази, йан на мьне әw бьдана, т'әвайишәwата жи бәгәм наки.

[17] Qӧрбана Хwәде хwәш, р'ӧһ'е шкәсти йә, дьле мьлук ә, кӧ Хwәде т'әхсир накә.

[18] Бь р'әзәдьлийе qәнщийе Сийонер'а бькә, сура Оршәлиме бьдә сәкьнандьне.

[19] Һьнге qӧрбанед р'астийе wе Тә хwәш бен, дийарийед шәwат у т'әвайишәwате у сәр горигәһа Тәйе щанәга бен дайине.