Зәбур 71
[1] Хӧдано, мьн хwә дайә бьн сийа Тә, бьра әз т'ӧ щар шәрми нәбьм.
[2] Wәкә һәqийа Хwә мьн хwәй кә у азад кә, гӧһ бьдә мьн у мьн хьлаз кә.
[3] Бьбә qәйайе сьт'аргәһа мьн, кәла зорә азадийа мьн , чьмки Тӧ йи зьнаре мьн у кәла мьн.
[4] Хwәде мьн! Мьн хьлаз кә жь дәсте нәп'ак, жь дәсте нәһәq у зӧлмк'ар.
[5] Тӧ йи гӧмана мьн, Хӧдан Хwәйо, жь зар'отийеда гӧмана мьн Тӧ йи.
[6] Жь бәт'ьнеда мьн хwә спартийә Тә, жь зькмакийеда Тӧ йи хwәйкьрийе мьн, пәсьндайина мьн т'ьме бона Тә йә.
[7] Бона гәләка әз бумә ә'щебәк, ле Тӧ йи сьт'аргәһа зор.
[8] Дәве мьн пәсьндайина Тәва т'ьжи йә, т'әвайийа р'оже жи шькьрдарийа Тәва.
[9] Калтийа мьнда Тӧ пьшт нәдә мьн, qӧдумнәкьрьнеда мьн бәр'нәдә.
[10] Чьмки нәйар мьqабьли мьн хәбәр дьдьн, әwед ч'ә'ве wан ә'мьре мьн ә, һәвр'а дьшеwьрьн
[11] у дьбежьн: «Хwәде дәст жь wи к'ьшандийә, пәй к'әвьн у wи бьгьрьн, чьмки кәс т'ӧнә кӧ wи хьлаз кә».
[12] Хwәдейо, жь мьн дур нәк'әвә, Хwәдейе мьн, зу Хwә мьнр'а бьгьһинә!
[13] Бьра шәрми бьн у бьqәльн шькийаткьред мьн, бьра р'обәтийе у беһӧрмәтийева бьньхӧмьн, әwед кӧ хьрабийа мьн дьхwазьн.
[14] Ле бәле гӧмана мьне т'ьме Тӧ би, әзе пәсьндари у шькьрдарийе Тә зедә кьм.
[15] Дәве мьне һәqийа Тә сальх кә, һәр р'ож хьлазкьрьна Тә, һ'әсабе wан мьнва нә ә'йан ә.
[16] Әзе бем кьред Хwәйи Хӧданә мәзьн гьли кьм, wан кьрьнед Тәйә һәq, т'әне бир биньм.
[17] Хwәдейо! Жь зар'отийа мьнда Тә әз һин кьрьм у һ'әта ньһа к'әрәмәтед Тә сальх дькьм.
[18] Калти у р'у-р'әмантийа мьнда жи мьн нәһели, Хwәдейо, һ'әта qәwата Тә ньсьле майинр'а бежьм у qӧдрәта Тә һ'әму һатийар'а.
[19] Хwәдейо, кьред Тәйә һәq һ'әта ә'змен ьн, Тә гәләк тьштед мәзьн кьрьнә. Хwәдейо, к'и мина Тә йә?
[20] Тә кӧ әз гәләк тәнгаси у щәфар'а дәрбаз кьрьм, ле Те диса бине бьди бәр мьн у жь к'урайийа ә'рде диса мьн дәрхи.
[21] Те мьн бьльнд ки у барьстан ки.
[22] Әзе жи пәсьне Тә бьдьм Хwәдейо, ль сәр чәнг бона амьнийа Тә, ль сәр чәнге зис бьстьрем әшqи Тә, Пирозе Исраеле!
[23] Леве мьне ша бьн, гава Тәр'а бьстьрем, нәфса мьн жи, к'ижан кӧ Тә хьлаз кьр.
[24] Зьмане мьне т'әмамийа р'оже бона кьред Тәйә һәq бежә, чьмки шәрми бун у бунә р'обәт, әwед хьрабийа мьн дьхwәстьн.