<Зәбур 135

[1] Һалелуйа! Пәсьне наве Хӧдан бьдьн, пәсьне бьдьне, гәли хӧламед Хӧдан,

[2] йед кӧ Хана Хӧданда дьсәкьньн, һ'әwшед Хана Хwәдейе мәда ньн.

[3] Пәсьне Хӧдан бьдьн, чьмки Хӧдан qәнщ ә, әшqи наве Wи бьстьрен, чьмки әв йәк хwәш ә.

[4] Хӧдан Хwәр'а Аqуб бьжарт, Исраел чаwа мьлк'е Хwә.

[5] Әз заньм кӧ Хӧдан мәзьн ә, Хwәйе мә сәр һ'әму хwәдейар'а йә.

[6] Хӧдан ча дьхwазә ӧса дькә, ә'рд у ә'зменда, нава бә'ра, ӧса жи һ'әму к'урайийада.

[7] Жь һәр чар qӧлба, ә'wра дәрдьхә, бона баране бьруске чедькә, жь ә'мбаред Хwә байе р'адькә.

[8] Әwи ньхӧрийед Мьсьре кӧштьн, жь мәрьва гьрти, һ'әта һ'әйwен.

[9] Нишан у к'әрәмәтед ә'щеб анин сәре тә, һәй Мьсьре! сәре Фьрәwьн у хӧламед wи.

[10] Әwи гәләк мьләта хьст у п'адшед зор qьр'кьрьн:

[11] Сихон п'адше әморийа, Ог п'адше Башане у һ'әму п'адшед Кәнане.

[12] Ә'рде wана wарти да, wаре щьмә'та Хwә Исраеле.

[13] Хӧдано! Наве Тәйе һәр т'ьм һәбә, Хӧдан, qӧр'нә-qӧр'нә Те бейи биранине.

[14] Чьмки Хӧдане һәqийе щьмә'та Хwә бькә у ч'ә'ве р'ә'ме хӧламед Хwә бьньһер'ә.

[15] П'утед мьләта жь зер' у зив ьн, чебуйед пе дәсте инсен ьн.

[16] Дәве wан һәнә, хәбәр надьн, ч'ә'ве wан һәнә, әw набиньн.

[17] Гӧһе wан һәнә, әw набьһен у бин т'ӧнә бәр бевьла wан.

[18] Йед wана чедькьн у wанда гӧман ьн, әwе жи бьбьнә мина wан.

[19] Мала Исраел! Пәсьне Хӧдан бьдьн. Мала Һарун! Пәсьне Хӧдан бьдьн.

[20] Мала Леwи! Пәсьне Хӧдан бьдьн. Йед жь Хӧдан дьтьрсьн! Пәсьне Хӧдан бьдьн

[21] Бьра жь Сийоне Хӧдан бьмбарәк бә, Йе кӧ Оршәлимеда дьминә! Һалелуйа!