Зәбур 140
[1] Йа Хӧдан, жь мәрьве хьраб мьн хьлаз кә у жь йе зӧлмдар Тӧ мьн хwәй кә.
[2] Әw дьле хwәда хьрабийе дьшеwьрьн у һәр р'ож шәр'а т'әвр'адькьн.
[3] Мина мә'ра зьмане хwә туж дькьн, жә'ра мә'ре тәйар бьн левед хwәда хwәй дькьн . (Сәла)
[4] Йа Хӧдан, һ'әвза мьн жь нәп'ака бькә у жь йе зӧлмдар Тӧ мьн хwәй кә, әwе кӧ шеwьр дькьн, ньг бавежьнә бәр мьн.
[5] К'ӧбара бона мьн qәйд у шьрит вәшартьн, т'ор' р'ахьстьнә сәр р'е, т'әлә данин бона мьн. (Сәла)
[6] Мьн готә Хӧдан: «Тӧ и Хwәде мьн», йа Хӧдан, дәнге һеwарза мьн бьбьһе!
[7] Хӧдан Хwәйо, qәwата азадийа мьн! Сийа сәре мьн и, р'ожа шер'да.
[8] Йа Хӧдан, хwәстьнед нәп'ака нәйни сери, фькьред wанә хьраб wанр'а ль һәв нәйни, кӧ әw нәкьн к'ӧбари. (Сәла)
[9] Бьра нәйаред дора мьн сәр нәк'әвьн, гәф-гӧр'ийа wан бе сәре wан.
[10] Бьра шәле агьр сәр wанда бьбарә, wан бавежә биред к'ур, кӧ әw иди р'анәбьн.
[11] Бьра щийе бӧхданбеж дьнйайеда т'ӧнә бә, бьра хьрабийа wи бьбә т'ор', wи ӧнда кә.
[12] Заньм Хӧдан бәре Хwә дьдә бәләнгаза, диwанеда к'әсибар'а һәqийе дькә.
[13] Ә'сә бесуще шькьрийе бьдьнә наве Тә у р'асте ль бәр ч'ә'ве Тә бьдәбьрьн.