<Зәбур 7

[1] Хӧдан, Хwәде мьн! Мьн хwә дайә бьн сийа Тә. Жь пәйк'әтийед мьн, мьн хьлаз кә у азад кә.

[2] Йан на әwе мина шера мьн бьдьр'иньн у вәжәньн азадкьре мьне т'ӧнә бьн.

[3] Хӧдано, Хwәде мьн! Һәгәр мьн тьштәк кьрийә, йан дәсте мьнда нәһәqи һәйә,

[4] йан мьн нәһәqи херхwазр'а кьрийә, щийе һәqи-нәһәq дьжмьне хwә шеландийә,

[5] бьра дьжмьн пәй мьн к'әвә мьн бьгьрә у ә'мьре мьн ль сәр дьне п'епәс кә, р'умәта мьн жи ах-халийеда бәтал кә. (Сәла)

[6] Дә р'абә Хӧдано, бь һерса Хwә, бәр гәф-гӧр'ийа дьжмьнед мьн бьсәнә. Дә һ'ьшйар бә һена мьнда, Хӧдано! Нә Тә һәqи ә'мьр кьрийә?

[7] Бьра щьвина мьләта дора Тә бьгьрә, сәр wанр'а Хwә бьдә һелана жорьн.

[8] Хӧдан сәр мьләтада дьньһер'ә. Хӧдано, Тӧ һәqийе ль мьн бькә, ль гора wе р'асти у бесущийа мьн.

[9] Бьра хьрабийа нәп'ака бьт'әр'ьбә, ле йед сьтqе дьле р'аст бьшьдинә, Тӧ нет у дьле мьн ә'нәнә дьки, Хwәдейе кӧ ль сәр р'астийе йи!

[10] Мәрт'ала мьн Хӧдан ә, йе дьле р'аст хьлаз дькә.

[11] Хwәде һ'акьме р'аст ә, һәр р'ож сәр нәп'ака һерск'әти йә.

[12] Һәгәр әw нәп'ак вәнәгәр'ә, Әwе шуре Хwә бона wи туж кә, кәване Хwә саз кә, нишан бьгьрә.

[13] Ч'әкед кӧштьне wир'а һазьр кә, тиред Хwә жи wе бькә йед агьри.

[14] Ва, йе нәһәq жь нәһәqийе пе майә, хьрабийева һ'әмлә йә, дәрәwийе тинә.

[15] Ч'ә'ле дьк'олә, әw к'ур дькә, ле хwәха дьк'әвә wе т'әле.

[16] Хьрабийа wи вәдьгәр'ә сәре wи, зӧлмдарийа wи те сәр qафе wи.

[17] Бона р'астийа Wи, әзе шькьрийе бьдьмә Хӧдан у бьстьрем әшqи наве Хӧдане Һәри Жорьн.