<Зәбур 19

[1] Ә'зман бона р'умәта Хwәде дьбежьн, ә'рше ә'змен шьхӧлед дәсте Wи к'ьфш дькьн.

[2] Р'ож р'ожер'а хәбәре дьбежә, шәв шәвер'а занәбуне вәдькә.

[3] Зьман т'ӧнә, готьн т'ӧнә, дәнге wана найе бьһистьне,

[4] ле шә'дәтийа wан бәла дьбә т'әмамийа ә'рде у готьнед wан дьгьһижьнә сәре дьне . Хwәде ә'зменда бона тә'ве конәк вәгьрт,

[5] мина зә'вайе жь бьн п'әр'де кӧ дәрте, мина мерхасе кӧ пе р'әва хwә ша йә.

[6] Әw жь алики ә'змен дәрте, дьчә һ'әта алийе дьне у жь гәрма wе т'ӧ тьшт найе вәшартьне.

[7] Һинкьрьна Хӧдан к'амьл ә, мерьв әw нуйәжийин дькә. Т'әмийед Хӧдан бехельф ьн, садәйа әw сәрwахт дькьн.

[8] Qанунед Хӧдан р'аст ьн, дьле мерьв ша дькьн. Фәрманед Хӧдан зәлал ьн, ч'ә'вед мерьв р'онайи дькьн.

[9] Хофа Хӧдан хальс ә, һ'әта-һ'әтайе дьминә. Qьраред Хӧдан һәq ьн, т'әмамийа хwәва әw р'аст ьн.

[10] Әwә һе һавьжи нә, нә кӧ зер', нә кӧ әw зер'е һәри сафи, жь һьнгьв у һьнгьве шьме ширьнтьр ьн.

[11] Хӧламе Тә пе wан те хwәйкьрьне, йе пек тинә, хәлата wи п'ьр' мәзьн ә.

[12] К'и дькарә шашийед хwә нас кә? Жь гӧнәйед вәшарти Тӧ мьн паqьж кә,

[13] жь к'ӧбарийе хӧламе Хwә хwәй кә, бьра әw һ'ӧкӧми ль сәр мьн нәкьн. Һьнге әзе беләк'ә бьм, жь нәһәqийед мәзьн әзе паqьж бьм.

[14] Бьра готьнед дәве мьн у әw фькьред дьле мьн ль бәр Тә бенә qәбулкьрьн, Хӧдане Qәйайе мьн у Азадкьре мьн.