<Зәбур 25

[1] Хӧдано, әз щанийа хwә бәрбьр'и Тә дькьм.

[2] Хwәдейе мьн! Әз Тәда гӧман ьм, бьра әз шәрми нәбьм, дьжмьн дьле хwә ль мьн ша нәкьн.

[3] Бьра йед Тәда гӧман шәрми нәбьн, бьра әw шәрми бьн у р'ур'әш бьн, әwед беамьнә нәмамийе дькьн.

[4] Хӧдан, р'ийед Хwә нишани мьн кә у мьн һини шьвәр'ийед Хwә кә.

[5] Бәре мьн бьдә р'астийа Хwә, һин кә, чьмки Тӧ йи әw Хwәдейе хьлазкьре мьн у һәр р'ож әз гӧмана хwә дьдьмә сәр Тә.

[6] Бир бин, Хӧдан, р'ә'м у һ'ӧба Хwә, чьмки әwә һ'әта-һ'әтайи нә.

[7] Гӧнәйед зар'оти у нәһәqийед мьн бир нәйнә, ле ль гора һ'ӧба Хwә мьн бир бинә, бона хатьре qәнщийа Хwә, Хӧдано!

[8] Qәнщ у р'аст ә Хӧдан, ләма гӧнәк'ара һини р'е дькә.

[9] Әw бәрбь һәqийе мьлука дьбә у р'ийа Хwә мьлука һин дькә.

[10] Һ'әму р'ийед Хӧдан дьлован у амьн ьн, бона йед пәйман у т'әмийед Wи хwәй дькьн.

[11] Хӧдано, бьди хатьре наве Хwә, суще нәһәqийа мьн кӧ мәзьн ә, диса бьди хатьре бахша Хwә.

[12] Әw мәрьве кӧ жь Хӧдан хоф дькә, Әwе һин кә кӧ к'ижан р'ийе бьбьжерә.

[13] Нәфса wийе хер-хwәшийеда бьминә у зӧр'әта wийе ль ә'рде wар бә.

[14] Сьр'а Хӧдан бона хофк'ешед Wи йә Әw пәймана Хwә wанва ә'йан дькә.

[15] Ч'ә'ве мьн т'ьме ль Хӧдан ә, чьмки Әwе ньге мьн жь т'әле дәрхә.

[16] Бәре Хwә бьдә мьн у мьн wәрә р'ә'ме, чьмки әзи бекәси дәро-дәр ьм.

[17] Кӧле дьле мьн зедә дьбьн, жь ван дәрд-кӧла дәрхә Тӧ мьн.

[18] Дина Хwә бьдә мьн мә'рьми у р'әбәни, бьбахшинә һ'әму гӧнәйед мьнә кьри.

[19] Дина Хwә бьдә п'ьр'анийа нәйаред мьн, чаwа к'ин у бохийева дьжәньнә мьн.

[20] Нәфса мьн хwәй кә у мьн хьлаз кә, шәрми нәбьм, кӧ хwә дайә бьн сийа Тә.

[21] Һ'әлали у р'асти бьра мьн хwәй кьн, чьмки әз бь гӧман һивийа Тә мә.

[22] Хwәдейо, азад кә Исраеле, жь бәр һәр тә'ли-тәнгийе .