<Зәбур 55

[1] Хwәдейо, гӧһ бьдә дӧайе мьн у пьшта Хwә нәдә р'әщайе мьн.

[2] Дина Хwә бьдә мьн у щаба мьн бьдә, дьлтәнгийеда әз шашо-п'аш бумә у шине дькьм,

[3] жь дәст дәнге нәйар у тәнгасийа нәп'ак. Чьмки нәһәqийе ль сәр мьнда дьбариньн у бь һерсе мьн дьзериньн.

[4] Дьл нав мьнда дьләрьзә у хофа мьрьне сәр мьнда гьрт.

[5] Тьрс у ләрьзәке әз гьртьмә у р'ьсасе әз мьна кьрьмә .

[6] Мьн гот: «Хwәзи мина кәwа баскед мьн һәбуна кӧ әз бьфьр'ийама у р'ьһ'әт бума.

[7] Әзе бьр'әвийама дур бьчума, чол-бәстада әзе бьмама. (Сәла)

[8] Мьне бькьра жь бәр фьзьрдумане у бобәлиске сьт'арәк хwәр'а бьдита».

[9] Йа Хӧдан, заре wан шаш кә, зьманед wан т'әвиһәв кә, чьмки бажерда зордари йә, һәвк'әтьне әз дьбиньм.

[10] Әвана шәв у р'ож һәр чар алийава ль сәр сура wи дьгәр'ьн, беолити у хьраби жи навда йә.

[11] Wеранбун нава wида йә, дәрәwи у зордари жь мәйданед wи кем набьн.

[12] Нәйар нинә сәре мьн дькә, мьн сәбьр кьра, йан пәйк'әтийед мьн йе кӧ хwә сәр мьнр'а дьгьрә, мьн хwә же вәшарта.

[13] Ле бәле тӧ һогьре мьн, һәвал у пьсмаме мьн,

[14] кӧ мә һәвр'а ширьн-ширьн һәвалти дькьр у т'әви мьхӧлqәте Хана Хwәдеда дьгәр'ийан.

[15] Бьра мьрьн ньшкева сәр wанда бьгьрә у сахә-сах әw бьк'әвьнә дийаре мьрийа, чьмки нава wан у һеwаргәһед wанда хьраби һәйә.

[16] Ле әзе һәwара хwә Хwәде дайньм у Хӧдан wе мьн хьлаз кә.

[17] Әзе сьбәһ, нивро у евар, бькьм зарин һеwарзә у Әwе бьбьһе дәнге мьн,

[18] бь ә'дьлайе мьн хьлаз кә жь wи шәр'е мьqабьли мьн, чьмки гәләк ьн нәйаред мьн.

[19] Хwәде wе бьбьһе у Йе Һәр-Һәйейи ль сәр к'ӧрсийе wе дәвәр'уйа wан бинә, (Сәла) чьмки әw найенә гӧһастьне у жь Хwәде натьрсьн.

[20] Дәсте хwә һьлда сәр һогьред хwә у пәймана хwә т'әр'ьбанд.

[21] Жь дәве wи гӧл у нур дьбарьн, ле шәр' һәйә дьле wида, заре wи жь мәлһ'әме нәрмтьр ә, ле хwәха шуре к'ашкьри йә.

[22] Тӧ баре хwә бьдә Хӧдан Әwе һьлгьрә дәwса тә. Әwе т'ӧ щар нәһелә, wәки йе р'аст бьльк'ӧмә.

[23] Ле Тӧ Хwәдейо, Те wан бавежи ч'ә'ла мьрьне, мәрьвед qәт'ьл у мьхәнәт wе нәгьһижьнә ниве р'ожед хwә. Ле әз Тәда гӧман ьм.