<Зәбур 102

[1] Йа Хӧдан! Дәнге мьн бьбьһе, бьра заринийа мьн бьгьһижә Тә.

[2] Р'ожа охьрмед гьранда бәре Хwә жь мьн нәгӧһезә, гӧһе Хwә бьдә ль сәр мьн. Wе р'ожа кӧ гази Тә дькьм Тӧ зутьре щабе бьдә мьн.

[3] Р'ожед мьн мина ду бәтавәдьбьн, һәстуйед мьн чаwа агьрда бьшәwьтьн.

[4] Дьл нава мьнда мина гиһайе һ'ьшки к'әтийә, һ'әта хwарьна хwә жи бир кьрийә.

[5] Жь дәст дәнге заринийа мьн, әз бум чаwа ч'әрм у һәсту.

[6] Әз бум мина кӧнде бәр'ийе, wи буме кори хьрабада.

[7] Мина ч'ьвика ль сәр хани, әз бехәw мам т'әне майи.

[8] Т'әмамийа р'оже нәйар тә'на ль мьн дьхьн, йед к'ина мьн гьртьнә әз кьрьмә готә-гот.

[9] Хӧре мьн к'ози йә дәwса нан, һесьр т'әви вәхwарьна хwә кьрьн,

[10] жь дәст һерс у алава к'әла Тә, кӧ Тә әз гьртьм wеда авитьм.

[11] Ә'мьре мьн мина сийа еваре йә у әз мина гиһе һ'ьшкбуйи мә.

[12] Ле бәле Хӧдан, т'әхте Тә, т'әхте һәр-һәйе йә у биранина Тә qӧр'нә-qӧр'нә йә.

[13] Те р'аби Сийоне бейи р'ә'ме, чьмки wәхтә кӧ дьлован би, wә'дә иди пер'а гьһиштийә.

[14] Чьмки хӧламед Тә кәвьред wе бәгәм дькьн у һ'әйфа wан т'оза wе жи те.

[15] Мьләте жь наве Хӧдан бьтьрсьн, һ'әму п'адшайед ә'рде жь р'умәта Wи.

[16] Хӧдане Сийоне ава кә, бь р'умәта Хwә хӧйа бә.

[17] Әwе бьбьһе дӧайе бекәса у дӧайед wан wе беqәдьр нәкә.

[18] Бьра әв йәк бе ньвисаре бона qӧр'на кӧ те, кӧ щьмә'та нәбуйи һе пәсьне Хӧдан бьдьн,

[19] кӧ Әw жорда жь Щийе Хwәйи Пироз дьньһер'ә, Хӧдан жь ә'змен дина Хwә дьдә ль ә'рде,

[20] бона кӧ зарә-зара гьртийа бьбьһе у йед мьрьнер'а дайи хьлаз кә,

[21] wәки Сийонеда наве Хӧдан бькьн дәнги у пәсьне Wи жи Оршәлимеда,

[22] гава щьмә'т т'әви п'адше бьщьвьн, бона кӧ Хӧдан бьһ'әбиньн.

[23] Әwи р'еда qӧдуме мьн сьст кьрьн, р'ожед мьн жи кьн кьрьн.

[24] Мьн гот: «Хwәдейе мьн! Ниве р'ожада һьлнәдә мьн. Салед Тә жь qӧр'нә һ'әта qӧр'на нә».

[25] Пешийе Тә һ'име ә'рде данийә, ә'зман жи кьре дәсте Тә йә.

[26] Әwе ӧнда бьн, ле Те бьмини, һ'әмуйе мина к'ьнща бьмашьн, Те мина бәршо wан бьгӧһези у әwе дәрбаз бьн ӧнда бьн.

[27] Ле Те нәйейи гӧһастьн у салед Тәйе хьлаз нәбьн .

[28] Әwләдед хӧламед Тә wе бьжин, ньсьле ч'ә'ве Тә сәр wе qәдим бьн.