<Зәбур 59

[1] Мьн хьлаз кә жь дьжмьнед мьн, Хwәдейе мьн! Мьн хwәй кә жь йед мьqабьли мьн.

[2] Мьн хьлаз кә жь беолкьра, мьн азад кә жь хунхӧра.

[3] Чьмки ва йә, хwә ль мьн тәландьнә, зордар мьqабьли мьн щьвийанә, ле Хӧдан нә бона гӧнә у хьрабийед мьн,

[4] щийе һәqи-нәһәq сәр мьнда дьгьрьн, к'аре хwә дькьн. Р'абә һәwара мьн у дина Хwә бьде.

[5] Тӧ Хӧдан, Хwәдейе Ордийа, Хwәдейе Исраел, р'абә диwана һ'әму мьләта бькә, йед нәп'акә хайин нәйе р'ә'ме. (Сәла)

[6] Еваре әw вәдьгәр'ьн, мина куч'ька дькьнә гьр'ә-мьр' у дор бажер әw дьгәр'ьн.

[7] Бьньһер'ә әw дәве хwә чаwа вәдькьн, левед wанда шур һәнә, «К'и wе бьбьһе?» әw дьбежьн.

[8] Ле Тӧ Хӧдан, сәр wан дьк'әни, һ'әму п'утп'арьста дьки пек'әни.

[9] Әз дина хwә дьдьмә Тә, qәwата мьн, чьмки Хwәде йә кәла мьн.

[10] Хwәдейе бь һ'ӧба Хwә мьнр'а бьгьһинә, Хwәде wе дьле мьн сәр дьжмьн ша кә.

[11] Wан нәкӧжә, кӧ щьмә'та мьн бир нәкә, бь qәwата Хwә wан бәла-бәлайи кә, дәвәр'уйа бавежә, йа Хӧдан, мәрт'ала мә.

[12] Дә бьра әw бона гӧнәйе дәве хwә у хәбәра леве хwә, к'ӧбарийа хwәда бенә гьртьне, бона wан ньфьр'а у дәрәwед кӧ әw дькьн.

[13] Wан гәвәр кә Тӧ пе һерсе, wан гәвәр кә, кӧ к'ок ле бен. Бьра т'әмамийа дьне бьзаньбә, кӧ Хwәде хwәйитийе Аqуб дькә. (Сәла)

[14] Еваре әw вәдьгәр'ьн, мина куч'ька дькьн мьр'ин у дор бажер әw дьгәр'ьн.

[15] Бона хӧрәк әw дьгәр'ьн кӧ набиньн, дькьн кастин.

[16] Ле бәлеәзе , пәсьне qәwата Тә бьдьм у сьбәһе әшqи һ'ӧба Тә бьстьрем, чьмки Тә хwәйити ль мьн кьр, р'ожед тәнгасийеда мьнр'а буйи сьт'ар.

[17] Qәwата мьн! Әшqи Тә әзе бьстьрем, чьмки Хwәде йә кәла мьн, Хwәде йә хwәйе һ'ӧба амьн.