<Зәбур 106

[1] Һалелуйа! Р'ази бьн жь Хӧдан, чьмки Әw qәнщ ә, чьмки һ'ӧба Wи һ'әта-һ'әтайе йә.

[2] К'и wе сальх кә кьред Хӧданә мәзьн, к'и wе ә'лам кә һ'әму пәсьне Wи?

[3] Хwәзи ль wан кӧ һәqийе хwәй дькьн у һәр гав хwә р'астийе дьгьрьн!

[4] Мьн бир бинә, йа Хӧдан, гава qәнщийе ль щьмә'та Хwә бьки. Бәре хwә бьдә мьн гава Тӧ wан хьлаз ки,

[5] wәки хwәшийа бьжартийед Тә бьбиньм, пе шабуна мьләте Тә ша бьм у пе wаре Тә бьфьр'ьм.

[6] Мә кал у бавед хwәва гӧнә кьрьн, беолити qәдандьн, нәп'аки кьрьн.

[7] Кал у бавед мә Мьсьреда к'әрәмәтед Тә фә'м нәкьрьн, һ'ӧба Тәйә мәзьн бир нәанин, ле сәри һьлдан ль бәр бә'ре, бәр Бә'ра Сор.

[8] Ле Wи бона наве Хwә әw хьлаз кьрьн, wәки qәwата Хwәйә мәзьн бьдә к'ьфше.

[9] Бә'ра Сор һьлат әw мьч'ьqи, к'урайева әw дәрбаз кьрьн, чаwа бәстева.

[10] Жь дәсте п'әйк'әти хьлаз кьрьн, әw азад кьрьн жь дәсте нәйар.

[11] Аве нәйаред wан ньхамтьн у т'ӧ кәс жь wан нәма.

[12] Һьнге баwәрийа хwә созе Wи анин у әшqи наве Wи стьран.

[13] Ле бәле зутьре кьред Wи бир кьрьн, әw һивийа ширәтед Wи нәман.

[14] Бәр'ийеда гәләки тәмсьсти кьрьн у Хwәде щер'ьбандьн ль чол бәстеда.

[15] Хwәстьнед wан Әwи да wан, нәхwәши жи шандә сәр wан.

[16] Гава зомеда һ'әвсуди кьрьн, авитьнә Муса у Һарун пирозед Хӧдан.

[17] Ә'рд вәбу Дат'ан даqӧртанд у щьвата Авирам ньхамт.

[18] Агьр алав да щьвата wан, алаве нәп'ак шәwьтандьн.

[19] Гольк чекьрьн Һ'оребеда, бәр сурәте р'окьри сәре хwә данин.

[20] Хwәдейе р'умәта хwә дьлqе гольке гиһахӧрр'а гӧһер'ин.

[21] Wан бир кьрьн хьлазкьр Хwәдейе хwә, кӧ кьред мәзьн Мьсьреда кьрьнә,

[22] ӧса жи к'әрәмәт wәлате Һамда, тьштед нәбуйи ль дәве Бә'ра Сор.

[23] Һьнге гот кӧ Әw гәрәке wан ӧнда кә, һәгәр бьжартийе Wи Муса нава wанда ль бәр Wи нәсәкьнийа, һерса Wи нәдабуйа данине, кӧ qьр'а wан нәанийа.

[24] Wана wәлате һавьжи бер'умәт кьрьн, баwарийа хwә созе Wи нәанин.

[25] Конада бина хwә тәнг кьрьн, гӧһдарийа дәнге Хӧдан нәкьрьн.

[26] Һьнге Әwи бь сонд дәсте Хwә бьльнд кьр, кӧ бәр'ийеда wан ӧнда кә.

[27] Зӧр'әта wан нав мьләта бәла кә, wәлатада т'ур'-т'ур'и кә.

[28] Һьнге wан хwә ль Баә'л-П'ьһор гьртьн у qӧрбанед мьрийар'а дайи хwарьн,

[29] бь кьред хwә Хӧдан һерс хьстьн у нәхwәшийа һ'ал гьһиштә wан.

[30] Һьнге Пинһас к'әтә хирәте у нәхwәшийа һ'ал сәкьни.

[31] Әв йәк wир'а р'асти һатә һ'әсабе, qӧр'нә-qӧр'нә, һ'әта-һ'әтайе.

[32] Wан Хӧдан һерс хьстьн ль бәр авед Мерибаһе, р'уйе wанда сәре Муса бәржер бу.

[33] Wана дьле wи ешандьн у wи бь дәве хwә зедәзьмани кьр.

[34] Мьләтед майин qьр' нәкьрьн, чаwа кӧ Хӧдан готьбу wан,

[35] ле әw т'әви п'утп'арьста бун у һини кьред wана бун.

[36] Хӧламти п'утед wанар'а кьрьн у әw бунә бәла сәре wан.

[37] Кӧр' у qизед хwә кьрьнә qӧрбан щьнар'а,

[38] хуна бесущ р'етьн, хуна кӧр' у qизед хwә, кӧ п'утед Кәнанар'а кьрьнә qӧрбан у бь хуне ә'рд һ'әр'ьмандьн.

[39] Бь шьхӧлед хwә ләwьт'ин у бь кьред хwә qави кьрьн.

[40] Аwа һерса Хӧдан ль щьмә'та Wи р'абу у жь wаре Хwә Әw зьвер бу.

[41] Әw данә дәсте мьләта, нәйара һ'ӧкӧми сәр wан кьр.

[42] Дьжмьна тәнгаси данә wан у әw тәwийан бьн дәсте wан.

[43] Гәләк щара Хӧдан әw хьлаз кьрьн, ле әw р'абәри Wи дьбун, жь дәст нәһәqийед хwә әw бер'умәт бун.

[44] Ле Әwи диса сәр тәнгасийа wанда ньһер'и, гава заринийа wан Әwи бьһист.

[45] У бир ани пәймана Хwәйә т'әви wан, анәгори һ'ӧба Хwәйә мәзьн ль wан вәгәр'ийа.

[46] Хwәде кьр кӧ һесиркьред wан дьлован бьн һьндава wан.

[47] Мә хьлаз кә, Хӧдано, Хwәдейе мә у жь нав мьләта мә т'оп кә, wәки шькьрийе бьдьнә наве Тәйи пироз у бь р'умәта Тә әм бьфьр'ьн.

[48] Шькьр Хӧдан Хwәдейе Исраелр'а, һ'әта-һ'әтайе! Бьра т'әмамийа щьмә'те бежә: «Амин!» Һалелуйа!