<Зәбур 10

[1] Хӧдано, чьма Тӧ Хwә дур дьгьри? Тәнгасийада Хwә вәдьшери?

[2] Нәп'ак бь к'ӧбарийа хwә пәй фәqир к'әтийә, бьра әw хwәха бьк'әвә т'әла хwәйә фькьри.

[3] Бәле нәп'ак бь нете дьле хwә дьфьр'ә у йе тьма Хwәде дьк'ьфьрә, беһӧрмәт дькә .

[4] Йе нәп'ак жь дәст бабахийе Хwәде нагәр'ә, т'әмамийа фькьра wида Хwәде т'ӧнә.

[5] Һәр т'ьм р'ийед wи жер'а р'аст дьбьн, qьраред Тә wир'а бьльнд ьн, дури wи нә, п'ьфи сәр һ'әму дьжмьнед хwә дькә.

[6] Дьле хwәда дьбежә: «Әзе нәльк'ӧмьм, qӧр'нә-qӧр'нә жи хьрабийе нәйенә сәре мьн».

[7] Дәве wида т'ьжи ньфьр', дәрәw, гәф-гӧр'и йә, бьн зьменда жи мьхәнәти у нәһәqи йә .

[8] Тә'лдед гӧндада хwә вәдьшерә, йе ами-т'ам бь дьзива әw дькӧжә у ч'ә'ве wи бь дьзива сәр фәqир ә.

[9] Әw qӧлч'ада хwә дьтәлинә, мина wи шере нә'ла хwәда. Әw дьтәлә чаwа бькә фәqир бьгьрә, фәqир дьгьрә у давежә т'ор'а хwә.

[10] Хwә дькә qонщьк у п'ал дьдә , йе бәләнгаз дьк'әвьнә нав ләпе wи.

[11] Дьле хwәда дьбежә: «Хwәде бир кьрийә, Әwи р'уйе Хwә ньхамтийә, кӧ Әw т'ӧ щар нәбинә».

[12] Р'абә, Хӧдан, Хwәдейо! Бьльнд бькә Дәсте Хwә у бәләнгаза бир нәкә.

[13] Чьма йе нәп'ак Хwәде беһӧрмәт кә, дьле хwәда бежә: «Хwәде сәрда наньһер'ә».

[14] Нә Тӧ wан бәләнгаза дьбини? Тӧ ль сәр тә'ли-тәнгийада дьньһер'и кӧ бь дәсте Хwә һәqе нәп'ак бьди. Бәләнгазед хwә ль Тә спарти, пьштоване сеwийа әw Тӧ йи.

[15] П'әр'е нәп'ак у хьраба Тӧ бьшкени, гава хьрабийа wан бьгәр'и Тӧ нәбини.

[16] Хӧдан п'адше һ'әта-һ'әтайе йә, п'утп'арьсте бәтавәбьн жь ә'рде Wи.

[17] Тӧ хwәстьна бәләнгаза дьбьһейи, йа Хӧдан! Дьле wан бьшьдин у гӧһ бьдә сәр wан,

[18] сәр диwана сеwи у бәләнгазда бьньһер'ә, wәки мәрьве дьне иди wи нәтьрсинә.