<Зәбур 32

[1] Хwәзи ль wи бәндәйи, кӧ нәһәqийед wи һатьнә афукьрьне у гӧнәйед wи һатьнә бахшандьне!

[2] Хwәзи ль wи мәрьви, кӧ Хӧдан жер'а нәһәqийе һ'әсаб накә у дьле wида qәлпи т'ӧнә .

[3] Гава мьн гӧнәйе хwә нәда р'уйе хwә, һәстуйед мьн һ'әлийан-машийан, жь дәст заринийа мьнә т'әмамийа р'оже.

[4] Чьмки шәв у р'ож дәсте Тә сәр мьн гьран бу, тәр'айийа мьн бу мина зьһайа һавине. (Сәла)

[5] Һьнге мьн гӧнәйе хwә Тәва ә'йан кьр у нәһәqийа хwә вәнәшарт, мьн гот: «Әзе шашийа хwә ль бәр Хӧдан бьдьмә р'уйе хwә». У Тә нәһәqийа гӧнәйе мьн бахшанд. (Сәла)

[6] Бона ве йәке һәр кәсе амьн, гава хwә нас кә, бь дӧакьрьне wе бәрбь Тә бе. Һьнге һәгәр лейийед ава жи ль сәр һәвр'а дәрбаз бьн, әwе т'ӧ щар нәгьһижьнә wи.

[7] Сьт'аргәһа мьн Тӧ йи, жь тәнгасийе Тӧ мьн хwәй дьки, бь стьранед азадийе Тӧ дора мьн дьгьри. (Сәла)

[8] «Әзе тә аqьл у сәрwахт кьм у р'ийа кӧ теда һәр'и бәр тә вәкьм, ч'ә'ве Мьне ль сәр тә бә, тә ширәт кьм.

[9] Мина һәсп у qант'ьр'а нәбьнә бефә'м, wан гәм у т'әмб дькьн кӧ зәфти wә бьн».

[10] Щәфайед нәп'ака wе гәләк бьн, ле һ'ӧба амьн wе бьгьрә дора wан, к'ижана гӧмана хwә данә сәр Хӧдан.

[11] Бь Хӧдан әшq у ша бьн, гәли сьтqе дьле р'аст, дәнге хwә һьлдьн һ'әмуйед дьлада р'аст.