<Зәбур 42

[1] Чаwа кара хәзала һ'әйра р'еч'е ава йә, ӧса жи р'ӧһ'е мьн һ'әйра Тәда йә, Хwәдейо!

[2] Р'ӧһ'е мьн т'ийе Хwәде йә, Хwәдейе зенди йә. К'әнге әзе бем бәр диндара Хwәде һазьр бьм?

[3] Һесьред мьн шәв у р'ож бунә хӧре мьн, кӧ һәр гав дьбежьнә мьн: «К'ане йә Хwәдейе тә?»

[4] Әв йәк кӧ тен бира мьн, агьр-шәwат мьн дьк'әвә, чаwа мьхӧлqәтер'а мьн хwә дьгиһанд, бь wанр'а т'әвайи бь дәнге әшqе у шькьрдарийе, к'ома щәжьнева әз дьк'әтьмә Хана Хwәде.

[5] Чьма нав мьнда дьк'ьзк'ьзи р'ӧһ'е мьн, чьма нава мьнда нә р'ьһ'әт и? Гӧмана хwә ль Хwәде бинә, чьмки әзе диса пәсьне Wи бьдьм, хьлазкьре хwә у Хwәдейе хwә.

[6] Р'ӧһ'е мьн нав мьнда дьк'ьзк'ьзә, ләма Тә бир тиньм жь ә'рде Урдöне у Һәрмоне, жь ч'ийайе Митсаре.

[7] Ль wьр бебьни дәнг дьдә бебьнийе бь дәнге авшьр'ькед Тә, һ'әму лейи у пелед Тә ль сәр мьнр'а дәрбаз бун.

[8] Р'оже Хӧдан һ'ӧба Хwә дьдә ә'йанкьрьне, шәве жи стьрана Wи т'әви мьн ә, дӧайе мьн жи бәр бь Хwәдейе ә'мьре мьн ә.

[9] Әзе бежьмә Хwәдейе Qәйайе хwә: «Чьма Тә әз бир кьрьмә? Чьма бь дьле кӧл әз бьгәр'ьм, жь зерандьна дәсте дьжмьн?»

[10] Дьжмьн ӧса тә'на ль мьн дьхьн, те бежи һәстуйед мьн һурхwәши дькьн, гава һәр р'ож дьбежьнә мьн: «К'ане йә Хwәдейе тә?»

[11] Чьма нав мьнда дьк'ьзк'ьзи р'ӧһ'е мьн, чьма нава мьнда нә р'ьһ'әт и? Гӧмана хwә ль Хwәде бинә, чьмки диса әзе пәсьне Wи бьдьм, хьлазкьре хwә у Хwәдейе хwә.