<Зәбур 147

[1] Һалелуйа! Qәнщ ә әшqи Хӧдан бьстьрен, чьмки хwәш у һежа йә пәсьндайин.

[2] Хӧдан Оршәлиме ава дькә, сьргунбуйед Исраеле һәв дьдә.

[3] Дьлшкәстийа qәнщ дькә у бьринед wан дьп'еч'ә.

[4] Әw һ'әсабе стәйрка к'ьфш дькә, бь һәр навәки wан гази дькә.

[5] Хӧдане мә мәзьн ә, хwәйе qӧдрәта п'ьр' ә, занәбуна Wи бе синор ә.

[6] Хӧдан дәст давежә бәләнгаза, ле нәп'ака дәвәр'уйа тинә дькә хали.

[7] Бь шькьрдарийе Хӧданр'а бьстьрен, сәр чәнг Хӧданр'а мьqаме ле хьн.

[8] Әw ә'змен пе ә'wра дьньхемә, баране бона ә'рде һазьр дькә, сәре ч'ийа гиһе дьдә шинкьрьне.

[9] Әw хӧрәке һ'әйwен дьдә wан, ӧса жи йе щущукед qар'qар'е, гава әw дькьнә qьр'ә-qьр'.

[10] Хӧдан бәгәм накә qәwата һәспе нә жи р'әва чокед инсен,

[11] ле Әw хофк'ешед Хwә бәгәм дькә, wанед һ'ӧба Wида кӧ гӧман ьн.

[12] Һәй Оршәлим, пәсьне Хӧдан бьдә! Шькьрийе бьдә Хwәде хwә, һәй Сийоне!

[13] Чьмки Әw зәр'зед дәргәһед тә дьшьдинә у нава тәда дӧа зар'ед тә дькә.

[14] Әw ә'дьлайе дьдә синоред тә у гәньмед жьбарәва тә т'ер дькә.

[15] Әw ә'мьре Хwә дьшинә сәр дьне у хәбәра Wи зу бәла дьбә.

[16] Әw мина һьрийе бәрфе дьбаринә, qьше мина т'озе дьр'әшинә.

[17] Әw шәле бузе дькә тәйрок дьбаринә, к'и дькарә ль бәр сәрма Wи тәйах кә.

[18] Әw хәбәра Хwә дьшинә wан дьһ'әлинә у байе Хwә р'адькә, ав дьһәр'ькә.

[19] Әw хәбәра Хwә Аqубр'а дьбежә, qанун у qьраред Хwә жи Исраелр'а.

[20] Бона т'ӧ мьләти Хӧдан аһа нәкьр, wан qьраред Wи нас нәкьрьн. Һалелуйа!