<Зәбур 22

[1] Хwәдейе мьн! Хwәдейе мьн! Тә чьма әз һьштьмә? Хwә жь хьлазкьрьн у дәнге һеwарза мьн дур гьртийә.

[2] Хwәдейо! Әз р'ож гази Тә дькьм ле Тӧ щаба мьн нади, шәве жи дәнге мьн найе бьр'ин.

[3] Ле бәле Тӧ Йе Пироз и, сәр т'әхте Хwә р'уньшти йи, пәсьндайина Исраеле йи,

[4] Кал-бавед мә Тәда гӧман бун, Тәда гӧман бун, Тә әw азад кьрьн.

[5] Ль Тә кьрьн һәwар, әw хьлаз бун гӧман дан сәр Тә, шәрми нәбун.

[6] Ле әз кӧрм ьм нә кӧ мәри, нав мәрьвада беһӧрмәткьри нав щьмә'тада сосрәтбуйи.

[7] Һ'әмуйед кӧ мьн дьбиньн, әw qәрфе хwә ль мьн дькьн, дәве хwә ль мьн хар дькьн, сәре хwә дьһ'әжиньн у дьбежьн:

[8] «Дә бьра хwә бьсперә Хӧдан у Әw wи хьлаз кә, дә бьра wи азад кә, һәгәр Әw жь wи р'ази йә»

[9] Ле бәле Тӧ йи, йе әз жь бәт'ьне дәрхьстьм, бәр бьстане дийа мьн, Тә әз бехоф кьрьм.

[10] Әз жь бәт'ьнеда спарти Тә буйи, жь зькмакийеда Тӧ Хwәдейе мьн и.

[11] Жь мьн дур нәк'әвә, чьмки тәнгаси незик ә ле к'омәкдарәк т'ӧнә.

[12] Гәләк щанәга дора мьн дьгьрьн, бохед Башанейә зор сәр мьнда дьгьрьн.

[13] Мина шере дәвхун мьр'ә-мьр' дькьн у әw qилед хwә ль сәр мьн вәдькьн.

[14] Әз мина аве темә р'етьне, һәстуйед мьн жь һәв тенә бәр'дане, дьл нав мьнда дьһ'әлә мина шьме.

[15] Qәwат ль мьн зьһа дьбә, мина щер'е ахин һур-һури дьбә, зьман дәмахе мьнва дьqәмьтә, Тӧ мьн дьки аха мьрьне.

[16] Сә-куч'ька әз кьрьмә нава хwә, к'ома нәһәqа дора мьн гьрт, дәст у п'ийед мьн qӧл кьрьн .

[17] Һ'әму һәстуйед мьн тенә жьмаре, мьн т'әмашә дькьн дина хwә дьдьне.

[18] К'ьнщед мьн нава хwәда бәла дькьн у сәр к'ьнща мьн п'әшк давежьн .

[19] Ле Тӧ Хӧдано, жь мьн дур нәк'әвә! Qәwата мьн! Зу бькә Хwә мьнр'а бьгьһинә.

[20] Нәфса мьн Тӧ жь шур хьлаз кә, мьн тайи жи жь нав ләпе сә-куч'ька.

[21] Мьн хьлаз кә жь qиле шер у азад кә жь стьруйед гайед бәйани.

[22] Әзе наве Тә бьратийа хwәр'а сальх кьм, нава щьвинеда пәсьне Тә бьдьм .

[23] Гәли хӧданхофа! Пәсьне Wи бьдьн! Гәли зӧр'әта Аqуб! Р'умәте бьдьн! Һ'әму зар'ед Исраел! Жь Wи хоф бькьн!

[24] Чьмки Әwи пьшт нәда йе т'әнгәзар, бәләнгазийа wи беһӧрмәт нәкьр, р'уйе Хwә Әwи жь wи вәнәшарт, гава wи һәwар кьр, Хwәде бьһист.

[25] Щьвина мәзьнда әзе бьдьм пәсьне Тә, ль бәр wан хофк'ешед Тә, биньмә сери ад-qьраред хwә, бона wи хатьре Тә.

[26] Бәләнгазе бьхwьн у т'ер бьн , пәсьне Хӧдан бьдьн йед Wи дьгәр'ьн. Дьле wә бьра бьжи һ'әта-һ'әтайе!

[27] Һәр qӧлбе дьнйайе wе бир биньн у бәрбь Хӧдан wе вәгәр'ьн. Һ'әму бәрәкед мьләта, wе сәре хwә бәр Тә дайньн.

[28] Чьмки п'адшати йа Хӧдан ә, Әw сәрwертийе мьләта дькә.

[29] Һ'әму к'ӧп-к'ӧпед әве дьне, әwе бьхwьн у бәр та бьн у һәр кәсе п'ара хwәлийе, кӧ фьрари йә ль сәр ә'рде, wе бьк'әвә бәр ль сәр чоке.

[30] Ньсьле хӧламтийе Wир'а бькьн, наве Хwәде qӧр'на пәйр'а wе qьсә кьн.

[31] Wе бен у хьлазкьрьна Wи wан мәрьвар'а бькьн дәнги, к'ижанед кӧ wе бенә дьне, wе бежьн: «Хӧдан әв йәк кьрьнә».