<Зәбур 115

[1] Нә кӧ мә Хӧдан, нә кӧ мә, ле р'умәте бьдә наве Хwә, бона һ'ӧб у амьнийа Хwә.

[2] Чьма п'утп'арьст бежьн: «К'ане Хwәдейе wан?»

[3] Хwәдейе мә ль ә'змен ә, Әw чь дьхwазә wе жи дькә.

[4] Ле п'утед wан зер' у зив ьн, кьред дәстед мерьв ьн.

[5] Дәве wан һәнә нак'ельмьн, ч'ә'вед wан һәнә набиньн,

[6] гӧһе wан һәнә набьһен, позе wан һәнә бине һьлнадьн.

[7] Дәстед wан һәнә нап'әлиньн, ньгед wан һәнә әw нагәр'ьн у жь гәwрийа хwә дәнг дәрнахьн.

[8] Йед wан чедькьн wе бьбьнә мина wан у ӧса жи һ'әмуйед кӧ wанда гӧман ьн.

[9] Гәли Исраелийа! Хӧданда гӧман бьн, Әw ә к'омәкдар у мәрт'ала wә.

[10] Мала Һарун! Хӧданда гӧман бә, Әw ә к'омәкдар у мәрт'ала wә.

[11] Гәли Хwәдехофа! Хӧданда гӧман бьн, Әw ә к'омәкдар у мәрт'ала wә.

[12] Хӧдан мә бир тинә у мә пироз дькә, wе мала Исраел пироз кә, wе мала Һарун пироз кә,

[13] wе хwәдехофа пироз кә, бьч'ука жи т'әви мәзьна.

[14] Бьра Хӧдан wә зедә кә, wә у әwләдед wәва.

[15] Дӧа ль wә бә жь Хӧдан, ә'фьрандаре ә'рд у ә'зман.

[16] Ә'зман ә'зманед Хӧдан ьн, ле ә'рд Wи да мәрьвайе.

[17] Мьри пәсьне Хӧдан надьн, к'ижан кӧ ль wаре кәр' у лал ьн.

[18] Ле әме пәсьне Хӧдан бьдьн, жь ньһава һ'әта-һ'әтайе. Һалелуйа!