<Зәбур 31

[1] Хӧдано, мьн хwә дайә бьн сийа Тә, бьра әз т'ӧ щар шәрми нәбьм, анәгори һәqийа Хwә мьн хьлаз кә.

[2] Гӧһе Хwә бьдә Тӧ сәр мьн, бькә кӧ мьн зу хьлаз ки. Бона мьн бьбә кәла кәвьри, мала сьт'арбуне кӧ мьн азад ки.

[3] Чьмки Тӧ йи qәйа у кәла мьн, Тӧ бона хатьре wи наве Хwә, бьбә р'ебәр у сәрwере мьн.

[4] Жь wе т'әле Тӧ дәрхә мьн, кӧ дьзива данибун бона мьн, чьмки Тӧ йи әw сьт'ара мьн.

[5] Р'ӧһ'е хwә дьдьмә дәсте Тә , бәле Тә әз хьлаз кьрьм, Хӧдан, Хwәдейе амьнийе.

[6] Әз дьжәньмә йед пәй п'утед п'уч' к'әти, ле гӧмана мьн сәр Хӧдан ә.

[7] Пе һ'ӧба Тә әзе әшq у ша бьм, чьмки сәр мә'рьмийа мьнда Тә ньһер'и у тә'ли-тәнгийа мьн пе һ'әсийайи.

[8] Тә әз нәдам дәсте дьжмьн, ле данинә фьрәйе ньгед мьн.

[9] Мьн wәрә р'ә'ме, Хӧдано, чьмки әз нава тәнгасийеда мә, ч'ә'ве мьн, нәфс у щанийа мьн жь дьлешийе һ'әлийан-машийан.

[10] Ә'мьре мьн дәрбаз бу зәлулийе, салед мьн жи нә'лә-нә'ле, жь дәрд-кӧла qӧдум к'әтьм у һәстуйада һ'әлийам-машийам.

[11] Бәр һ'әму нәйара бум итойин, ль бәр щинаред хwә әз илаһи, саwа мьн дьк'әвә сәр насед мьн, йед дәрва дьбиньн жь мьн дьр'әвьн.

[12] Мина мьрийа жь дьла һатьмә биркьрьне, бумә чаwа дәрданәкә һурдәхwәши.

[13] Хәйба гәләка әз дьбьһем, һәр алийава саw мьн дьгьрә, гава әw һәвр'а һьмбәри мьн дьщьвьн, дьшеwьрьн кӧ бина бәр мьн бьстиньн.

[14] Ле әз Тәда гӧман ьм, Хӧдано, мьн гот: «Тӧ йи Хwәдейе мьн».

[15] Р'ожед мьн дәсте Тәда нә, мьн жь дәсте дьжмьн у пәйк'әтийа хьлаз кә.

[16] Сьфәте Хwә гӧл дә сәр ә'вде Хwә бь һ'ӧба Хwәйә амьн мьн азад кә.

[17] Хӧдано! Бьра әз шәрми нәбьм, чьмки әз гази Тә дькьм, бьра нәп'ак шәрми бьн дийаре мьрийада кәр' бьминьн.

[18] Дәвед дәрәwин бьра бен гьртьн, кӧ һьндава р'астада һ'ьр' дьбежьн, бь к'ӧбарийе у мьхәнәтийе.

[19] Чьqас мәзьн ә qәнщийа Тә, ль бәр һ'әму мәрьвайе, хофк'ешед Хwәр'а хwәй кьрийә Тә, к'ижан хwә дьдьнә бьн сийа Тә.

[20] Диндара Хwәва wан хwәйи дьки, жь дәст нәмамийед мәрьвайе, Коне Хwәда wан вәдьшери, жь зордарийа зьманийе.

[21] Шькьр жь Хӧданр'а, кӧ һ'ӧба Хwәйә һ'әйрә-һ'ӧжмәк'ар, нава нәйаред дора мьнда нишани мьн кьр!

[22] Т'әвһәвбуна хwәда мьн гот: «Бәр ч'ә'ве Тә әз к'әтьмә». Ле Тә дәнге дӧайе мьн бьһист, гава мьн Тә кьрә гази.

[23] Хӧдан һ'ьз кьн, һ'әму амьнед Wи, Хӧдан ширһ'әлала хwәй дькә, ле йед хwә бабахийе гьртьнә, хәзәбе сәр wанда дьбаринә.

[24] Сәрхwә бьн! Бьра дьле wә бьшьдьн, һ'әмуйед кӧ Хӧданда гӧман ьн.