<Зәбур 74

[1] Хwәдейо, Тә чьма әм лап жь бәр Хwә авитьн? Чьма һерса Тә р'абу ль сәр пәзе бәр Тә?

[2] Бир бинә wе к'ома Хwә кӧ Тә зува qазьнщ кьр, әw хьлаз кьр, кӧ бьбә qәбила п'ара Тә. Бир бинә ч'ийайе Сийоне кӧ ле дьмини.

[3] Гавед Хwә бавежә бәр бь хьрабәйед һәр т'ьм, wи Щийе Пирози кӧ нәйара wеран кьр.

[4] Пирозхана Тәда пәйк'әтийед Тә дькьн qар'ин, алед хwә чаwа нишан wьр данин.

[5] Ал к'ьфш дьбә мина йәки бьвьр һьлдайи ль сәр даред дарьстенр'а сәкьни.

[6] У аһа һәр нәхшед теда шкенандьн, һәвр'а бь бьвьр у чакуч'а хьшьрандьн.

[7] Агьр-алав авитьнә Пирозгәһа Тә, һ'әр'ьмандьн, кьрьн ах-хwәли Хана наве Тә.

[8] Дьле хwәда готьн: «Әм ван һ'әмуйа һәвр'а wеран кьн». Һ'әму щьватханед Хwәде wәлетда шәwьтандьн.

[9] Әм нишанед хwә набиньн, иди п'ехәмбәр т'ӧнәнә, кәсәк т'ӧнә т'әви мә, кӧ бьзаньбә һ'әта к'әнге әве аһа бә.

[10] Хwәде, һ'әта к'әнге нәйаре qәрфа бькьн? Пәйк'әтийе һәр т'ьм наве Тә беһӧрмәт кьн?

[11] Чьма Тӧ дәсте Хwәйи р'асте пашда дьк'ьшини? Чьма жь п'ашьла Хwә дәрнахи wан ӧнда наки?

[12] Ле бәле qӧр'нада п'адше мьн Хwәде йә, кӧ азадийе дькә ль р'уйе ә'рдейә!

[13] Тә бь qәwата Хwә бә'р qәлашт, Тә сәре зийа авада һ'ьнщьр'андьн.

[14] Тә сәред Леwйат'ан п'әлахтьн, әw кьрә хӧре р'ә'wьред чоле.

[15] Тә кани у щәw бьжьqандьн, Тә ч'әмед мәзьн мьч'ьqандьн.

[16] Р'ож йа Тә йә, шәв йа Тә йә, Тә һив у р'о хӧльqандийә.

[17] Тә һ'әму синоред ә'рде данин, Тә чекьрьн зьвьстан у һавин.

[18] Ле бир бинә, Хӧдан, кӧ нәйар qәрфа дькьн у наве Тә, мьләте беар беһӧрмәт дькьн.

[19] Тӧ щанийа кәwа Хwә нәдә р'ә'wьра, щьвина к'әсибед Хwә qәт бир нәкә.

[20] Һәла дина Хwә бьдә пәймана Хwә, щийед ә'рдейә тә'ри, малед зордарийева бунә т'ьжи.

[21] Бьра йед шкәсти шәрми нәбьн, к'әсиб у бәләнгаз пәсьне наве Тә бьдьн.

[22] Р'абә Хwәдейо, сәр һәqийа Хwә бә, әwан к'ьфьрийа Тӧ бир бинә, кӧ йе беаqьл һәр р'ож ль Тә тинә.

[23] Дәнге нәйаред Хwә бир нәкә, qәрәбальха йед мьqабьли Тә чьqас дьчә зедә дьбә.