<Зәбур 145

[1] Әзе Тә бьльнд кьм, йа Хӧдан, П'адша у пәсьне наве Тә бьдьм һ'әта-һ'әтайе.

[2] Һәр гав әзе пәсьне Тә бьдьм, п'айе наве Тә бьдьм һ'әта-һ'әтайе.

[3] Хӧдан мәзьн ә, һежайи гәләк пәсьна йә, мәзьнайийа Wи нә ль бәр һ'ьша йә.

[4] Qӧр'нә-qӧр'нә wе пәсьне кьред Тә бьдьн у кьред Тәйә мәзьн wе сальх кьн.

[5] Әзе сәр бәдәwәтийа р'умәта мәзьнайийа Тә у кьрьнед Тәйә һ'әйрә-һ'ӧжмәк'ар бьфькьрьм.

[6] Wе сәр кьрьнед Тәйә саwә-хоф хәбәр дьн у әзе мәзьнайийа Тә сальх кьм.

[7] Wе биранина к'әрәма Тәйә мәзьн бәла кьн у әшqи р'астийа Тә бьстьрен.

[8] Дьлшәwат у р'ә'м ә Хӧдан, хwәйе сәбьр-ськ'ане у һ'ӧбеда хьнейо.

[9] Хӧдан бона һ'әмуйа qәнщ ә, р'ә'ма Wи сәр һ'әму ә'фьринед Wи йә.

[10] Йа Хӧдан, һ'әму кьрьнед Тәйе пәсьне Тә бьдьн у һ'әму амьнед Тәйе жи шькьрийе.

[11] Wе р'умәта П'адшатийа Тә ә'йан кьн у qӧдрәтед Тә wе сальх кьн,

[12] wәки qӧдрәта Тә әwләдед мәрьвайева ә'йан кьн, ӧса жи мәзьнайийа р'умәта П'адшатийа Тә.

[13] П'адшатийа Тә п'адшатикә һ'әта-һ'әтайе йә у сәрwертийа Тә qӧр'нә-qӧр'нә йә.

[14] Хӧдан дәст давежә һ'әму к'әтийа у йе тәwийайи дьдә сәкьнандьне.

[15] Ч'ә'ве гьшка ль дәсте Тә йә у Тӧ wә'дәда хӧрәке wан дьди.

[16] Тӧ дәсте Хwә вәдьки, һ'әму бинбәри гора дьле wан т'ер дьки.

[17] Хӧдан р'аст ә, нава һ'әму р'е-дьрбед Хwәда у амьн ә, нава һ'әму шьхӧлед Хwәда.

[18] Хӧдан незики wан һ'әмуйа йә, к'ижан кӧ гази Wи дькьн, wан һ'әмуйа кӧ дьле р'аст гази дькьн.

[19] Әw мьразе wан дькә, к'ижан кӧ жь Wи дьтьрсьн, заринийа wан дьбьһе у wан хьлаз дькә.

[20] Хӧдан һ'әму һ'ьзкьрийед Хwә хwәй дькә, ле һ'әму нәп'ака wе ӧнда кә.

[21] Дәве мьн әшqи пәсьне Хӧдан wе вәбә у һәр ә'фьрине һ'әта-һ'әтайе пәсьне наве Wийи пироз бьдә .