<Зәбур 18

[1] Йа Хӧдан, әз Тә һ'ьз дькьм, qәwата мьн!

[2] Хӧдан ә зьнаре мьн, кәла у хьлазкьре мьн, Хwәдейе мьн, qәйайе мьн, әз хwә дьдьмә бьн сийа Wи. Әw ә мәрт'ал, стьруйе хьлазбуне у сьт'аргәһа мьн.

[3] Һәwара хwә Хӧдане хwәйипәсьн тиньм у жь дәсте нәйара әз хьлаз дьбьм.

[4] Хӧмама мьрьне әз гьртьм, лейийед wеране әз р'ода бьрьм.

[5] Зьнщиред гор'ьстен ль мьн wәлийан у т'әләкед мьрьне пешийа мьн гьртьн.

[6] Тәнгасийа хwәда мьн гази Хӧдан кьр, һәwар-газийа хwә Хwәде хwә кьр. Әwи жь П'арьстгәһа Хwә бьһист дәнге мьн, гьһиштә гӧһе Wи әw заринийа мьн.

[7] Һьнге ә'рд ләрьзи у һ'әжийа, һ'име ч'ийа дәрьзин у ләqийан, чьмки Хӧдан р'акьрьбу һерса Хwә.

[8] Жь бевьлед Wи ду же к'ьшийа, жь дәве Wи агьр-алав, к'уред егьр жь Wи пәкийан.

[9] Ә'зман тәwанд Әw һат жорда, ә'wре р'әш бу бьн п'ийада.

[10] Херуб сийар бу у фьр'и, сәр баскед бе Әw сьльли .

[11] Тә'ристан Хwәр'а кьрә орхан, авед тә'ри, т'әв ә'wред ә'зман һәр чар алийава Жер'а бун хан.

[12] Жь шәwqа Wи, тәйрок, бьруск ә'wред Wива дәрбаз бун чун.

[13] Хӧдан ә'зменда бьрq вәда, бь тәйрок у бьруске Йе Һәри Жорьн дәнг вәда.

[14] Тиред Хwә авитьн, нәйар бәла кьрьн, бьруск шандьн, әw т'әвиһәв кьрьн.

[15] Бьне бә'ра һатьнә дитьне у һ'име дьнйайе һатә к'ьфше, Хӧдано, жь wе һьлатьна Тә, гава дәрк'әт байе бевьла Тә.

[16] Әwи жорда дәст авитә мьн у әз гьртьм, жь к'урайед ава әз дәрхьстьм.

[17] Әз жь дәсте нәйаре мьни зор хьлаз кьрьм, жь йед дьжәнийанә мьн, кӧ жь мьн зортьр бун.

[18] Р'ожа охьрме гьранда wан гьрт пешийа мьн, ле бәле Хӧдан бу пьштоване мьн.

[19] Әз дәрхьстьмә фьрәйе хьлаз кьрьм, чьмки Әwи әз бәгәм кьрьм.

[20] Wәкә р'астийа мьн Хӧдан да мьн, әз хәлат кьрьм, wәкә паqьжийа дәсте мьн.

[21] Чьмки р'ийед Хӧдан мьн хwәй кьрьн, нәһәqи нәкьр, жь Хwәде хwә дур нәк'әтьм.

[22] Чьмки бәр мьн бун һ'әму qьраред Wи у мьн хwә дур нәхьст жь qанунед Wи.

[23] Әз ль бәр Wи беләк'ә бум нәһәqийеда һ'әвзәк'ар бум.

[24] Ләма Хӧдан да мьн, wәкә р'астийа мьн, кӧ дина хwә дьдә паqьжийа дәсте мьн.

[25] Тӧ амьнар'а амьн и, беqӧсурар'а беqӧсур и.

[26] Паqьжар'а паqьж и, һ'ьләк'арар'а дьди wәкә кьре wи.

[27] Чьмки тайе мәрьвед к'әти Тӧ йи, ле ч'ә'ве к'ӧбар-бабах ньмьз дьки.

[28] Бәле, йе ч'ьра мьн ведьхә Тӧ йи, Хӧдан Хwәде шәва мьн дькә р'онайи.

[29] Пе Тә әз һ'ьщуми сәр ордийе дькьм у пе Хwәдейе хwә сәр сурар'а банздьдьм.

[30] Р'ийа Хwәде к'амьл ә, готьна Хӧдан хальс ә, Әw мәрт'ал ә бона һәр кәсе Wида сьт'ар ә.

[31] Бәле к'и йә Хwәде, пештьри Хӧдан? Йан к'и йә Qәйа, хенщи Хwәде мә?

[32] Хwәде йә, Йе кӧ мьн qәwат дькә у р'ийа мьн бехәм дькә .

[33] П'ийед мьн дькә, мина п'ийед кара хәзале у мьн щийед бьльнд дьдә сәкьнандьне.

[34] Дәсте мьн һини шәр'кьрьне дькә у зәндед мьн кәване сьфьр дьтәwинә.

[35] Тә мәрт'ала Хwәйә азадийе да мьн, мьле Тәйи р'асте гьрт пьшта мьн, бәрбьһерийа Тә бу бьльндбуна мьн.

[36] Фьрә дьди авитьн Тӧ гавед мьн, кӧ нәльк'ӧмьн ньгед бьн мьн.

[37] Пәй нәйар к'әтьм, хwә wанр'а гиһанд, вәнәгәр'ийам һ'әта к'ока wан qәланд.

[38] Мьн ә'рде хьстьн у нькарьбун р'абьн у әw к'әтьнә бьн п'ийед мьн.

[39] Тә бона шер' пьштәк мьн да гьредан, әwед бәр мьн р'абуйи, әw кьрьнә бьне мьн.

[40] Тә р'әв кьрә нав нәйаред мьн, к'ока пәйк'әтийед хwә мьн ани.

[41] Wан кьр һәwар, һәwари нәһат, Хӧдан кьрьн һәwар, ле Wи щаб нәда.

[42] Мьн әw һеран мина т'оза бәр бе, мина һ'әр'ийа к'уче wеда авитьн.

[43] Жь шәр'-дә'wед щьмә'те Тә әз хьлаз кьрьм, сәр мьләтед хәриб сәрwер к'ьфш кьрьм, мьләтед мьнва нәнас, бунә хӧламед мьн.

[44] Ча бона мьн бьһистьн, wан гӧһдари ль мьн кьр, хәриб бәр мьн хwә та кьр.

[45] Qӧдуме чоке хәриб шкәстьн, жь qәсьред хwә р'ьщаф дәрдьк'әтьн.

[46] Хӧдан сах ә, пәсьне Qәйайе мьн бьдьн! Бьра бьльнд бә Хwәдейе азадийа мьн.

[47] Әw ә Хwәдейе кӧ һьлдьдә һ'әйфа мьн, мьләт жи кьрьнә бьн дәсте мьн,

[48] әз жь нәйар хьлаз кьрьм, жь хернәхwазед мьн бьльндтьр кьрьм у жь дәсте зӧлмдара азад кьрьм.

[49] Бона ве йәке, Хӧдано! Нав мьләтада әзе Тә бьльнд кьм, әшqи наве Тә әзе бьстьрем .

[50] Тӧ сәрк'әтьнед мәзьн дьди п'адше Хwә, Тӧ амьн и һьндава к'ьфшкьрийе Хwә, Даwьд у зӧр'әта wир'а һ'әта һ'әтайе.