<Зәбур 49

[1] Бьбьһен ве йәке һ'әму мьләтно, гӧһдар бьн һ'әму бьнәлийед дьне,

[2] бәләнгаз у йе ә'сьлзадә, дәwләти у к'әсиб һәвр'а т'әвайи.

[3] Дәве мьне сәрwахтийе бежә, фькьред дьле мьн заньстийе.

[4] Әзе гӧһе хwә бьдьмә сәр мәсәла готи, пе чәнге зис вәкьм сьр'а готьна хwә.

[5] Чьма бьтьрсьм әз р'ожед хьрабда, гава нәһәqийа нәйар дора мьн бьгьрә,

[6] йе гӧмана wи ль сәр qәwата wи йә у пе һәбука хwәйә п'ьр' дьфьр'ә?

[7] Бәле әw һәбук нькарә wи хьлаз кә у нә жи бәрделе бәрва бьдә Хwәде.

[8] Чьмки бьһа йә qимәте хьлазбуна wан, т'ӧ щар әв йәк набә кӧ бе дайин,

[9] wәки бьжи һ'әта-һ'әтайе у мьрьне әw нәбинә.

[10] Һәр кәс дьбинә кӧ сәрwахт дьмьрьн, мина ахмах у бефә'ма ӧнда дьбьн, һәбука хwә һьнәкә дьнр'а әw дьһельн.

[11] Qәбьред wан дьбьнә тамед һ'әта-һ'әтайе, әw щи-wаред wанә qӧр'нә-qӧр'нә нә, әв ьн кӧ наве хwә дьданә ль сәр щи-мьск'әна.

[12] Мәрьв хер-хwәшийеда дьреж наминә, wе мина һ'әйwен, әwе ӧнда бә һәр'ә.

[13] Әв ә р'ийа ахмаха, ахьрийа йед ә'мьре хwә р'ази нә. (Сәла)

[14] Мина пез бәрбьр'и дийаре мьрийа дьбьн, мьрьн шьване wан ә, әw р'аст бәржери гор'е дьбьн. Qальбе wане бьр'ьзә һәр'ә, гор'ьстане мала wан бә.

[15] Ле Хӧдане нәфса мьн жь дәсте дийаре мьрийа хьлаз кә, бәле Әwе мьн һьлдә щәм хwә. (Сәла)

[16] Нәтьрсә, кӧ мәрьв дәwләти дьбә у һәбука wе мале зедә дьбә,

[17] чьмки гава әw дьмьрә дьчә, нькарә тьштәки т'әви хwә һьлдә, әw һәбука wи т'әви wи начә.

[18] Һәгәр әw сахийа хwәда хwә бәхтәwар дьбинә у һ'әму жи пәсьне wи дьдьн, бона кӧ һәр тьшт wир'а ль һәв те,

[19] йәкә wе һәр'ә бьгьһижә wан пешийед хwә у иди т'ӧ щар әwе р'онайе нәбинә.

[20] Мәрьв, әw хер-хwәшийеда йә, ле ньзанә wе мина һ'әйwен ӧнда бә.