<Зәбур 83

[1] Хwәдейо, Хwә кәр' нәкә, бехәм нәбә, бедәнг нәминә. Хwәдейо!

[2] Ва йә нәйаред Тә дькьн qар'ин, пәйк'әтийед Тә сәри һьлтиньн.

[3] Һьмбәри щьмә'та Тә һ'ьләк'арийе дькьн, ль сәр хwәйкьрийед Тә шеwьра дәрдьхьн.

[4] Дьбежьн: «Wәрьн әм ван дьне һьлиньн, кӧ мьләт иди нәминә, наве Исраел нәйе биранин».

[5] Бь дьләки шеwьра хwә кьрьн, мьqабьли Тә йа хwә кьрьн йәк.

[6] Конед Әдом у исмайилийа, Моwаб у һащәрийа,

[7] Гәбал, Амон, Амалек у фьльстинийа т'әви бьнәлийед Суре,

[8] Ашур жи гьһиштә wан, чун пьшта кӧр'ед Лут . (Сәла)

[9] Тә һьнда нәwала Qишоне чь ани сәре мьдйанийа , Сисьра у Йавин , ӧса жи бинә сәре ван,

[10] к'ижан кӧ Ә'йн-Дореда гәвәр бун чун, бунә п'әйне бона ә'рде.

[11] Сәрwеред ван бькә р'ожа Орев у Зев , аха-бәгед ван р'ожа Зәбаһ' у Салмуна ,

[12] к'ижана гот: «Щи-wаред Хwәде әм зәфти хwә кьн».

[13] Хwәдейе мьн, вана бькә мина т'оза бобәлиске у мина кайа ль бәр бе.

[14] Чаwа агьр дарьстен дьк'әвә у чаwа алав ч'ийа дьк'ьзьринә,

[15] аһа жи Тӧ пәй wан к'әвә пе фьртона Хwә, wан бьбьздинә пе багәра Хwә.

[16] Р'уйе wана Тӧ р'ур'әш кә, кӧ әw Тә бьгәр'ьн, Хӧдано!

[17] Бьра т'ьме шәрмийе у саwеда бьн, бьра бь р'әзили к'ок ле бен.

[18] Бьра бьзаньбьн т'әне Тӧ йи, кӧ наве Тә Хӧдан ә, Йе Һәри Жорьн и, ль сәр т'әмамийа ә'рде йи.