<Зәбур 78

[1] Гәли щьмә'та мьн, гӧһ бьдьнә һинкьрьна мьн, ль бәр хәбәред дәве мьн гӧһе хwә та кьн.

[2] Бь мәсәла әзе дәве хwә вәкьм у сьр'ед бәре әзе ә'йан кьм ,

[3] к'ижан кӧ мә бьһистьн у пе һ'әсийан у кал-бавед мә мәр'а готьн.

[4] Әм гәрәке жь зар'ед wан вәнәшерьн у ньсьле майинр'а гәрәке бежьн, кьред Хӧданә хwәйир'умәт, qӧдрәта Wи у к'әрәмәтед кӧ Wи кьрьнә.

[5] Әwи qанун нава Аqубда qәдим кьрьн у һинкьрьн дани нава Исраел, ә'мьри кал-бавед мә кьр, кӧ зар'ед хwә әw һин кьн,

[6] wәки ньсьле майин у зар'ед кӧ бьбьн, бьзаньбьн, зар'ед хwәр'а әw бежьн,

[7] кӧ гӧмана хwә бьдьнә сәр Хwәде, кьред Хwәде бир нәкьн у т'әмийед Wи әw хwәй кьн.

[8] Ле бьра р'ийа кал-бавада әw нәчьн мьләте сәрһ'ьшк у мьqабьл әw нәбьн, кӧ дьле wан р'еда нә шьдийайи бә у р'ӧһ'е wан Хwәдер'а амьн нибә.

[9] Әwләдед Әфрайим сильһ'кьри бун, мина кәванед тирә ль сәр һазьр, ле р'ожа шер' әw пашда вәгәр'ийан.

[10] Вана пәймана Хwәде т'әр'ьбанд у анәгори һинкьрьна Wи дәрбаз нәкьрьн,

[11] к'әрәмәт у кьрьнед Wи бир кьрьн к'ижан кӧ Wи нишани wан кьрьбун,

[12] Бәр ч'ә'ве кал-бавед wан ә'щеб кьрьн, ль дәшта Зойане wәлате Мьсьреда.

[13] Бә'р qәлашт дан дәрбазкьрьне, ав мина лоде дан сәкьнандьне.

[14] Р'оже пе ә'wр р'ебәрийа wан кьр у т'әмамийа шәве пе р'онайийа егьр.

[15] Qәйа qәлаштьн нава бәр'ийеда, ав данә вәхwарьне, чаwа бебьнийеда.

[16] Щәw жь qәйе дәрхьстьн, ав жи мина ч'әма к'ьшийан.

[17] Ле wана һе ль бәр Wи гӧнә кьрьн, бәр'ийеда мьqабьли Йе Һәри Жорьн бун,

[18] дьле хwәда Хwәде щер'ьбандьн, хwарьна дьле хwә wан хwәстьн.

[19] Дәве хwә бәр Хwәде вәкьрьн у готьн: «Гәло Хwәде дькарә бәр'ийеда жи сьфьре дайнә?

[20] Р'аст Wи qәйе хьст, аве бьлq да, щәw һәр'ьки. Ле гәло нен жи дькарә бьдә? Гәло гошт жи һазьр дькә бой щьмә'та Хwә?»

[21] Аwа гава Хӧдан бьһист, Әw һерс к'әт, агьр бари сәр Аqубда, qьлqьли сәр Исраелда.

[22] Чьмки Хwәде баwәр нәкьрьн у гӧмана хwә нәдан сәр азадийа Wи.

[23] Әwи жорда ә'мьр ль ә'wра кьр, дәрийед ә'змен вәкьрьн,

[24] бона хӧрәк мана сәр wанда баранд нане ә'змен wанр'а шанд .

[25] Мерьв нане мьлйак'әта хwар, хӧрәке wәкә т'ербуна wан шанд.

[26] Ә'зменда байе р'оһьлате р'акьр, бь qӧдрәта Хwә байе башуре ани,

[27] мина т'озе гошт сәр wанда баранд, мина qума бә'ре жи һ'әйwанед хwәйип'әр',

[28] нава зома wан баранд у дора кона данә данин.

[29] Wана хwар у т'ер бун, Әwи хwәстьна wан да wан.

[30] Һе кемасийа хwәстьнед хwә нәдитьбун, һе хwарьна wан дәве wанда бу,

[31] һерса Хwәде ль сәр wан р'абу, Әwи мерхасед wан кӧштьн у щаһьлед Исраеле ә'рде хьстьн.

[32] Пәй һаqас тьштр'а диса гӧнә кьрьн у баwәрийа хwә к'әрәмәтед Wи нәанин.

[33] Аwа пе бош-бәталийе р'ожед wан хьлаз кьрьн у салед wан жи пе саw у тьрсе.

[34] Гава әw дькӧштьн, ль Wи дьгәр'ийан, хwә мӧкӧр' дьһатьн у дәстхwәда хwә диса давитьнә Хwәде.

[35] Дьк'әтә бира wан кӧ Хwәде Qәйайе wан ә у Хwәдейе Һәри Жорьн хьлазкьре wан ә.

[36] Ле бь дәве хwә һ'ьләк'ари дькьрьн у бь зьмане хwә Wир'а дәрәw дькьрьн.

[37] Дьле wан ль бәр Wи р'аст нибу у пәймана Wида амьн нибун.

[38] Ле Әw кӧ р'ә'м ә, гӧнәйед wана дьбахшинә у qьр'а wан Әw найинә. Һерседа гәләк щара Хwә зәфт дькьр у лап бина Хwә тәнг нәдькьр.

[39] Чьмки бир дани кӧ әw хун-гошт ьн, мина байе те дәрбаз дьбә пашда найе.

[40] Чьqаси бәр'ийеда бәр Wи р'абун у чоледа һерса Wи р'акьрьн!

[41] Диса Хwәде дьщер'ьбандьн у Пирозе Исраеле бинтәнг дькьрьн.

[42] Дәсте Wи бир нәанин, әw р'ожа кӧ жь дьжмьн хьлаз кьрьн,

[43] гава нишанед Хwә Мьсьреда кьрьн, дәшта Зойанда әw к'әрәмәтед Хwә.

[44] Ч'әмед wан Wи кьрә хун, ӧса жи щәwед wан кӧ нькарьбьн әw вәхwьн.

[45] Меш-мор шандьн Әwи сәр wан, кӧ wан бьхwьн, ӧса жи бәq кӧ wан п'уч' кьн.

[46] Дәрәмәта wан да зәрьке у к'әда wан да кӧлийе ,

[47] тьрийед wан да бәр тәйроке һежир жи данә бәр бузе,

[48] һ'әйwанед wан данә тәйроке кәрийед wан данә бьруске.

[49] Хәзәба Хwә ани сәре wан, бинтәнги, һерс, да тәнгаси у qасьдед qәт'ьле шандьнә сәр wан.

[50] Әwи р'ийа һерса Хwә вәкьр, нәфса wан жь мьрьне хwәй нәкьр, ле ә'мьре wан да нәхwәшийа һ'ал .

[51] Һәр ньхӧри Мьсьреда кӧшт, бәре бәдәнейи пеш, конед Һамда .

[52] Һьнге щьмә'та Хwә мина пез дәрхьст у мина кәре пез бәр'ийеда ажот.

[53] Әw бе qәзи бьрьн, әw нәтьрсийан, ле дьжмьнед wан бә'ре ньхамтьн.

[54] Әw бьрьн wәлате Хwәйи пироз, wи ч'ийайе кӧ дәсте Wийи р'асте пек анибу.

[55] Бәри мьләте пешийа wан да, ә'рде wан чаwа мьлк' wанр'а п'арәвәкьр у qәбилед Исраеле конед wанда щи-wар кьр.

[56] Ле wана Хwәде щер'ьбандьн мьqабьли Йе Һәри Жорьн р'абун, qанунед Wи хwәйи нәкьрьн.

[57] Мина кал-бавед хwә вәгәр'ийан у хальфин, мина кәванед qәлп беамьн дәрк'әтьн.

[58] Дьле Wи пе ощахед хwә qьлqьландьн, пе п'утед хwә һе алав данә хәзәба Wи.

[59] Гава Хwәде бьһист һерс к'әт у лап пьшт да Исраеле.

[60] Дәст жь п'арьстгәһа Шилойе к'ьшанд, жь wи Коне нава мәрьвада дьма.

[61] Qӧдрәта Хwә һесир да у р'умәта Хwә да дәсте дьжмьн.

[62] Щьмә'та Хwә да дәве шур у сәр wаре Хwә һерс к'әт.

[63] Хортед wан егьр хwарьн у qизед wан жи бе бәхт ман.

[64] К'аһинед wан пе шур к'әтьн у жьнәбийед wан нәгьрийан.

[65] Ле Хӧдан һ'ьшйар бу чаwа жь хәwе, мина мерхасе к'ефхwәш сәр һ'ьше хwәда һати,

[66] р'әв дьжмьн хьст qара һ'әта-һ'әтайе ани сәре wан.

[67] Коне Усьв т'әхсир кьр у qәбила Әфрайим бәгәм нәкьр.

[68] Ле qәбила Щьһуда бәгәм кьр у ч'ийайе Сийоне кӧ Wи һ'ьз кьр.

[69] Пирозгәһа Хwә мина ә'змен бьльнд чекьр, чаwа ә'рде кӧ һ'әта-һ'әтайе һ'им кьр.

[70] Хӧламе Хwә Даwьд бьжарт, әw жь ахьлед пез дәрхьст ани,

[71] әw жь бәр мийа гьрт ани, wәки шьвантийе щьмә'та Wи Аqуб, wаре Wи Исраел бькә.

[72] Әwи жи бь сахийа дьле хwә шьвантийа wан кьр, бь дәстә'мәлийа хwә р'ебәрийа wан кьр.