<Зәбур 33

[1] Бь Хӧдан әшq бьн гәли амьна, ль р'аста дьк'әвә пәсьндари.

[2] Бь чәнге зис шькьрийе бьдьнә Хӧдан, бь сазе дәһәт'ели Wир'а бьстьрен.

[3] Стьранәкә ну Wир'а бьстьрен, зор у хwәш саз хьн, дәнге бьльнди зьрьнгийе.

[4] Чьмки хәбәра Хӧдан р'аст ә у һ'әму кьрьнед Wи бь һәq-һ'әлалийе нә.

[5] Әw р'астийе у һәqийе һ'ьз дькә, һ'ӧба Хӧданва дьнйа т'ьжи йә.

[6] Бь хәбәра Хӧдан ә'зман ә'фьрин, бь бина бәр Wи һ'әму ә'ршед wан.

[7] Бә'ра мина лоде т'оп дькә, авед бебьнийа дькә ә'мбара.

[8] Т'әмамийа ә'рде бьра жь Хӧдан бьтьрсә у бьра жь Wи бьр'ьщьфә т'әмамийа т'опа дьне.

[9] Чьмки Әwи гот у qәwьми, Әwи ә'мьр кьр у qәдим бу.

[10] Хӧдан шеwьред п'утп'арьста хьраб дькә у фькьред мьләта бәтал дькә.

[11] Шеwьра Хӧдан qәwин у qәдим ә, фькьра дьле Wи qӧр'нә-qӧр'нә йә.

[12] Хwәзи ль wи мьләти, Хwәдейе к'ижани Хӧдан ә у ль wе щьмә'те, к'ижан бьжарт кьрә wаре Хwә.

[13] Хӧдан жь ә'змен жорда дьньһер'ә, т'әмамийа мәрьвайе дьбинә.

[14] Әw жь к'ӧрсийа Хwә дина Хwә дьдә т'әмамийа бьнәлийед дьнйайе.

[15] Дьле wан һ'әмуйа Әwи ә'фьрандийә у һаш жь һ'әму кьред wан һәйә.

[16] П'адша пе әскәред зә'ф хьлаз набә, нә жи йе мерхас пе qәwата зор.

[17] Һәсп дәрәw ә бона азадийе, пе qәwата хwәйә зор накә хьлазийе.

[18] Бәле ч'ә'ве Хӧдан ль сәр хофк'ешед Wи нә у ль сәр wанә кӧ һивийа һ'ӧба Wи нә,

[19] Әw нәфса wан жь мьрьне хьлаз дькә у wәхте хәлайе жи wан т'ер дькә.

[20] Нәфса мә һивийа Хӧдан ә, Әw алик'ар у мәрт'ала мә йә.

[21] Дьле мә пе Wи ша дьбә, чьмки гӧмана мә наве Wийи пироз ә.

[22] Хӧдан, дә бьра Тӧ ль сәр мә дьлован би, чаwа кӧ әм Тәда гӧман ьн.